“Trendyol daxil olduğu ölkələrdə ilk növbədə müştəri vərdişləri, populyar məhsullar, ödəniş üsulları və çatdırılma gözləntiləri ilə bağlı məlumat toplayır”.
Trendyol Group-da beynəlxalq biznesin inkişafı üzrə rəhbər Merve Özecan “E-Commerce Day of Azerbaijan 2025” tədbirində Trendyol-un yeni bazarlara daxil olarkən tətbiq etdikləri marketinq strategiyasından danışıb.
“Bu məlumatlar masa arxası analizlərlə kifayətlənməyib, yerli bazarın dinamik müşahidəsi və A/B testləri ilə dəstəklənir. Müştərinin hansı məhsulu, nə vaxt, hansı qiymətə və hansı kanalla aldığına dair məlumatlar əsasında fərdiləşdirilmiş rəqəmsal strategiyalar hazırlanır. Sosial media və influencer marketinqi, bazara uyğun seçilərək, effektiv şəkildə tətbiq olunur” deyə, o qeyd edib.
Şirkət rəsmisi bildirib ki, Trendyol fəaliyyət göstərdiyi ölkədə mədəniyyət bağlarına çox böyük önəm verir. Azərbaycanda isə yerli bayramlar, o cümlədən Novruz üçün xüsusi kampaniyalar hazırlanır.
“Sağlam inkişaf strategiyası qurmaq üçün əsas təməllərin güclü olması vacibdir. Yəni, təcrübə, çatdırılma və ödəniş prosesləri hər zaman effektiv və etibarlı olmalıdır ki, platforma istifadəçisində güvən yaransın” deyə o, əlavə edib.
