Myshops.az
Bakıda fəaliyyət göstərən Myshops.az onlayn mağazasının əməkdaşının müştəriyə qarşı qanunsuz hərəkəti sosial şəbəkələrdə ciddi rezonans doğurub. AzPost xəbər verir ki, vətəndaş Mələk Qasımova şəxsi Facebook hesabında mağaza əməkdaşı tərəfindən həm şantaj olunduğunu, həm də telefonunun səbəbsiz yerə bloklandığını açıqlayıb.
Vətəndaşın paylaşdığı yazışmalarda aydın olur ki, mağaza əməkdaşı Hacı Mütəllimov müştəriyə qarşı hədə-qorxu gəlirək, borc ödənməyincə telefonun açılmayacağını bildirib. Yazışmalarda müştərinin “Bu cür qayda yoxdur” iradına cavab olaraq əməkdaş “Bağlayacağam, ödəniş olunmamış açılmayacaq” yazıb. Daha sonra isə “Get hara istəyirsən şikayət elə” kimi ifadələrlə vətəndaşa təzyiq göstərib.
Mələk Qasımova bildirir ki, telefonun kredit ödənişlərini tam başa çatdırmasına baxmayaraq, əməkdaş ondan əlavə borc tələb edib və əks halda cihazın istifadəyə verilməyəcəyini bildirib. Əlavə olaraq, ona təqdim olunan 18 aylıq 128 manatlıq kredit müqaviləsinin əslində 12 aylıq olduğunu, bunu isə əməkdaşın “yaxşılıq məqsədilə dəyişdirdim” deməsi ilə öyrənib.
Hadisənin bayram günlərinə təsadüf etməsi və telefonun bağlanması səbəbindən vətəndaş 5 gün telefonsuz qalacağını qeyd edib. Yazışmalarda mağaza əməkdaşı tərəfindən “borcun olmasa belə, mən bağlayaram”, “Get harda istəyirsən şikayət elə”, “Bax bu dəqiqə sistemə girib bağlayıram” kimi qeyri-etik ifadələrin işlədilməsi də ictimai qınağa səbəb olub.
Eyni zamanda xanım sosial şəbəkədə məsələni ictimailəşdirdikdən sonra şantajla üzləşib. “Guya belə eləməklə nə isə əldə elədin? Vergi yoxlamasını gözləyərsən. Hər şey qarşılıqlıdır” – deyə mesaj yazıb.
Məsələ bununla da bitməyib. Mələk Qasımovanın sözlərinə görə, gecikmə yaranması bəhanəsi ilə kredit tarixçəsi də mənfi göstəriciyə salınıb və bu, gələcəkdə digər maliyyə əməliyyatları zamanı ciddi problem yaradacaq.
