Azərbaycan və Türkiyə daim bir-birlərinin yanındadır, bu, bundan sonra da belə olacaq.
APA xəbər verir ki, bunu Türkiyə Səfirliyində “15 iyul – Demokratiya və Milli Birlik Günü” münasibətilə keçirilən anım tədbirində xarici işlər nazirinin müavini Samir Şərifov deyib.
Nazir müavini bildirib ki, müasir Azərbaycan-Türkiyə münasibətləri Ulu Öndər Heydər Əliyevin “Bir millət, iki dövlət” şüarı əsasında inkişaf edir: “Bu gün müttəfiqlik münasibətlərinin dərinləşdirilməsi və genişləndirilməsi üçün 2021-ci ildə imzalanan Şuşa Bəyannaməsi zəmin yaradıb. Təkcə cari ilin 6-7 ayına nəzər alsaq, deyə bilərik ki, 2025-ci il iki ölkə arasında əlaqələr baxımından əlamətdar il olaraq yadda qalacaq. Cari ilin ilk yarısında artıq 5 qarşılıqlı səfər həyata keçirilib”.
Nazir müavini əlavə edib ki, iki ölkə arasında iqtisadi əlaqələr gündən-günə genişlənir, dərinləşir.
Samir Şərifov qeyd edib ki, enerji və logistika sahəsində Türkiyə və Azərbaycanın birgə həyata keçirdiyi layihələr qlobal enerji təhlükəsizliyini təmin edib: “Tarixinin ən parlaq inkişaf dövrünü yaşayan Azərbaycan-Türkiyə əlaqələri regional və beynəlxalq təşkilatlar çərçivəsində davam edir. Hətta birinin olmadığı platformalarda da Azərbaycan və Türkiyə bir-birinin maraqlarını müdafiə edir”.
