Çinin elektrik avtomobil istehsalçısı XPeng Motors yeni uğurla gündəmə gəlib.
AzPost-un məlumatına görə, şirkətin sədri He Syaopen elan edib ki, XPeng P7 modeli bir sutkada qət etdiyi məsafəyə görə dünya rekordunu yeniləyib. Avtomobil 24 saat ərzində 3961 kilometr yol gedib və bununla da Xiaomi, Mercedes-Benz və Porsche kimi brendləri geridə qoyub.
Əvvəlki rekord bu ilin əvvəlində Xiaomi YU7 krossoverinə məxsus idi – o, bir sutkada 3944 kilometr məsafə qət etmişdi. Ondan öncə isə 2019-cu ildə Porsche Taycan 3425 kilometr, 2024-cü ildə isə Mercedes-Benz CLA 3717 kilometr nəticə göstərmişdi. Beləliklə, XPeng P7 avtomobil dünyasında yeni göstərici müəyyənləşdirib.
Test yürüşləri zamanı istifadə edilən model XPeng P7-nin ikinci nəsli olub. Bu versiya 2025-ci ilin mayında təqdim edilib. Avtomobilin əsas modifikasiyası arxa ötürücülüdür və 367 at gücünə malikdir. Tam ötürücülü versiya isə iki mühərriklə təchiz olunaraq 594 at gücü hasil edir. Maksimal sürət 230 km/saatla məhdudlaşdırılıb.
Qeyd edək ki, XPeng P7 ilk dəfə 2019-cu ildə təqdim olunmuşdu və o vaxtdan bəri Çin elektromobil bazarında ən çox satılan modellərdən birinə çevrilib.
Avtomobil sənayesində digər diqqətçəkən hadisə isə General Motors-un hesabatında qeyd olunub. Şirkətin istehsal etdiyi elektrik pikapı Chevrolet Silverado avqustun əvvəlində bir dəfəlik enerji yığımı ilə 1500 kilometrdən çox məsafə qət edərək ayrıca rekord müəyyən edib.
Mütəxəssislər hesab edirlər ki, bu nəticələr Çinin elektrik avtomobil istehsalçılarını qlobal bazarda daha da gücləndirəcək və ənənəvi markalarla rəqabəti kəskinləşdirəcək.
