44 günlük Vətən müharibəsi iştirakçısı, vətən müharibəsi veteranı Səbuhi Məmmədovun anası qarşısında bank tərəfindən iddia qaldırılıb. Məlumata görə, Səbuhi Məmmədov 2 il əvvəl dəm qazından boğularaq vəfat edib, lakin onun Bank of Baku-dan götürdüyü təxminən 1000–1200 manatlıq kredit borcu hələ də mövcuddur.
AzPost xəbər verir ki, Bank əməkdaşları Səbuhi Məmmədovun anasına borcun ödənilməsini tələb edib və qeyd ediblər ki, “Oğlunuzun borcunu ödəyin ki, o dünyada da onu inkir-minkir narahat etməsin”. Hazırda məsələ məhkəməyə verilib və iş 1 sentyabr 2025-ci il tarixində Şirvan şəhər Məhkəməsində, hakim Əli İmanovun sədrliyi ilə baxılacaq.
Qeyd edək ki, Səbuhi Məmmədov Vətən müharibəsində göstərdiyi xidmətlərə görə bir neçə təltifə layiq görülüb. O, Prezident İlham Əliyevin 24 iyun 2025-ci il sərəncamı ilə “Xocavəndin azad olunmasına görə” medalı ilə təltif edilib. Həmçinin Səfərbərlik və Hərbi Xidmətə Çağırış üzrə Dövlət Xidməti tərəfindən “Hərbi vətənpərvərlik tərbiyəsində xidmətlərə görə” medalı və Əmək və Əhalinin Sosial Müdafiəsi Nazirliyi tərəfindən Təşəkkürnamə alıb.
