Pələng
Nepalın Madeş əyalətində pələng yerli sakinə hücum edərək onun həyatına son qoyub. AzPost xəbər verir ki, hadisə avqustun iyirmi yeddisi səhər saatlarında baş verib.
Məlumata görə, kənd sakini, əlli beş yaşlı Krişna Prasad Şarma skuter ilə Adhabhar meşəsinə gedib. O, mal-qarası üçün yem toplamaq məqsədilə meşəyə yollanıb, lakin geri qayıtmayıb. Ailəsinin polisə müraciətindən sonra axtarış işlərinə hüquq-mühafizə orqanları və hərbçilər cəlb olunub.
Axtarış zamanı Şarmanın parçalanmış cəsədi tapılıb. Polis ilkin ehtimala əsaslanaraq, ona vəhşi pələngin hücum etdiyini bildirib. Xüsusilə qeyd olunub ki, baş hissə hadisə yerində aşkarlanmayıb və axtarış davam edir.
Rəsmilər hadisənin dəqiq şəraitini araşdırır. Yerli sakinlər isə bölgədə pələnglərin insanlara hücum təhlükəsinin artdığını vurğulayırlar.
