Baku electronics
Bakıda yaşayan vətəndaş “Baku Electronics” mağazasından aldığı kondisionerlə bağlı ciddi narazılıq edib. AzPost xəbər verir ki, onun sözlərinə görə, iyul ayında şirkətdən aldığı iki ədəd “Bosch” markalı kondisionerin biri normal işləsə də, digəri istifadənin ilk aylarında fan səsi problemi yaradıb.
Şikayətçi bildirib ki, məsələ ilə bağlı servisə müraciət etsə də, əməkdaşlar peşəkar yanaşma göstərməyiblər:
“Cəmi 2 ay işləyən kondisionerin barabanının guya yuyulmalı olduğunu dedilər. Halbuki, bu qədər qısa müddətdə belə nasazlıq yaranması mümkün deyil. Bundan əlavə, əməkdaşlar kobud davranır, səbəbi araşdırmadan isə 25 manat ödəniş tələb etdilər”.
Məsələ ilə bağlı “Baku Electronics” şirkəti də açıqlama yayıb. Rəsmi cavabda qeyd olunub ki, hadisə araşdırılacaq və müştəridən məhsulu alan şəxsin əlaqə məlumatlarının təqdim olunması xahiş edilib. Şirkət vəd edib ki, müraciətə baxıldıqdan sonra ən qısa zamanda vətəndaşla əlaqə saxlanılacaq.
Qanunvericiliyə görə, istehlakçı aldığı məhsulun keyfiyyəti ilə bağlı narazılıq yarandıqda ödəniş tələb edilmədən zəmanət xidməti almaq hüququna malikdir. Azərbaycan Respublikasının “İstehlakçıların hüquqlarının müdafiəsi haqqında” Qanununun 15-ci maddəsinə əsasən, zəmanət müddəti ərzində məhsulda yaranan nasazlıqlar satıcı və ya istehsalçı tərəfindən ödənişsiz aradan qaldırılmalıdır.
Ekspertlər bildirirlər ki, belə hallarda vətəndaşların İqtisadiyyat Nazirliyinin Antiinhisar və İstehlak Bazarına Nəzarət Dövlət Xidmətinə müraciət etmək hüququ var. Əgər servis ödəniş tələb edirsə və ya problemi həll etmirsə, alıcı qanunla həm məhsulun dəyişdirilməsini, həm də ödənilən pulun geri qaytarılmasını tələb edə bilər.
Mütəxəssislər istehlakçılara tövsiyə edir ki, bu cür hallarda hüquqlarını tələb etsinlər və şirkətlərin əsassız ödəniş tələblərini qəbul etməsinlər.
