Son onilliklər ərzində Hollivud dünya kino sənayesinin mütləq lideri hesab olunurdu. Lakin Bloomberg analitiklərinin hesabatına görə, bu üstünlük artıq sarsılmağa başlayıb.
AzPost xəbər verir ki, Asiya, xüsusilə də Çin istehsalı olan filmlər qlobal bazarda Amerika blokbasterlərini sıxışdırır.
Simvolik dönüş nöqtəsi isə Çin istehsalı olan “Neçja Əjdaha Kralını məğlub edir” adlı animasiya filmi oldu. O, 2025-ci ildə 2 milyard dollardan çox gəlir əldə edərək ilin ən çox kassası toplayan filmi seçilib. Maraqlıdır ki, gəlirin 98 faizi yalnız Çin bazarından əldə olunub ki, bu da onu bir ölkədə ən çox izlənilən film rekorduna çıxarıb.
Məlumatlara görə, 20 il əvvəl dünya kassalarının 92 faizi Hollivud filmlərinə məxsus idisə, bu gün bu göstərici 66 faizə enib. Paralel olaraq Çin kinosu sürətli artım nümayiş etdirir. Ölkədə son on ildə kinozalların sayı dörd dəfə artaraq 90 min ekrana çatıb.
Ekspertlər hesab edir ki, ABŞ filmlərinin Çində nümayişi üçün kvotaların məhdudlaşdırılması, həmçinin yerli istehsalın keyfiyyətcə yüksəlməsi Hollivudun mövqeyini zəiflədir. Əgər Amerika studiyaları gəlirlərinin yarıdan çoxunu beynəlxalq satışdan əldə edirsə, Çin filmləri əsasən daxili auditoriyaya güvənir.
Bununla belə, Almaniya, Yaponiya və Fransa kimi ölkələr Hollywood ilə əməkdaşlıq və ortaq layihələr hesabına öz mövqelərini gücləndirirlər. Analitiklərin fikrincə, kino bazarında bu dəyişikliklər yeni “çoxqütblü dövrün” başlanğıcını göstərir və yaxın illərdə rəqabətin daha da kəskinləşəcəyi gözlənilir.
