Market
Bazarstore şəbəkəsinin bir filialında alış-veriş edən vətəndaş özünü haqsızlığa məruz qaldığını bildirib.
Müştəri Kamran Quliyev sosial şəbəkə hesabında yazıb ki, mağaza əməkdaşları tərəfindən əsassız şəkildə geri çağırılaraq oğurluqda ittiham olunub.
Onun sözlərinə görə, mühafizəçi arxasınca düşərək içəri çağırıb və “mağazaya aid bir şey götürüb-götürmədiyini” soruşub. Müştəri isə heç nə götürmədiyini bildirib. Quliyevin iddiasına görə, mağaza işçilərindən biri onun şirniyyat məhsulu götürüb gizlətdiyini söyləyib. Müştəri isə məhsulu qiymətini bəyənmədiyi üçün geri qoyduğunu və bunu kameraların təsdiq edə biləcəyini bildirib.
“Daha sonra onların səhv etdiyi ortaya çıxdı. Mən heç nə götürməmişdim. Amma məni hər kəsin içində oğru kimi göstərdilər, vaxtımı aldılar və heç sonda da üzr istəmədilər”, – deyə Quliyev vurğulayıb.
Narazı müştəri başına gələn hadisədən sonra haqsızlığa məruz qaldığını qeyd edərək, belə hallarda hara şikayət edə biləcəyini ictimaiyyətə ünvanladığı sualla gündəmə gətirib.
Hazırda məsələ ilə bağlı Bazarstore şəbəkəsinin mövqeyi açıqlanmayıb.
