Daha sürətli templə yeriyən insanların müxtəlif səbəblərdən ölüm riski daha aşağı olur.
Norveçin Trondheym şəhərində yerləşən Təbiət Elmləri və Texnologiya Universitetinin tədqiqatçıları bu qənaətə gəliblər.
Araşdırmanın nəticələri JAMA Network Open elmi jurnalında dərc olunub.
Tədqiqatçılar yazırlar ki, gündəlik atılan addımların sayı nəzərə alındıqdan sonra belə, yerimə sürəti və addımların tezliyi bütün səbəblərdən ölüm riski ilə davamlı əlaqə göstərib. Araşdırmaya Rayan Haddaj rəhbərlik edib.
Alimlər tədqiqat zamanı 1980-ci illərin sonlarında başlayan sağlamlıq araşdırması layihəsində iştirak edən 4 mindən çox britaniyalı dövlət qulluqçusunun məlumatlarını təhlil ediblər. Araşdırma iştirakçılarının orta yaşı təxminən 69 olub.
İştirakçılar hər dörd-beş ildən bir klinik müayinələrdən keçiblər. 2012–2013-cü illərdə onların yerimə sürəti də ölçülüb. Bundan başqa, gəzinti zamanı dəqiqədə neçə addım atdıqlarını müəyyənləşdirmək üçün xüsusi cihazdan istifadə olunub.
Nəticələr göstərib ki, daha sürətli yerimək tədqiqat dövründə ölüm riskinin 23 faiz azalması ilə əlaqəli olub. Daha tez-tez addım atanlarda isə ölüm riski 17 faiz aşağı qeydə alınıb.
Sürətli yerimək sağlamlıq haqqında nə deyir?
Nyu-Yorkdakı Staten-Aylend Universitet Xəstəxanasının Tibb şöbəsinin rəhbəri, doktor Teodor Strencin sözlərinə görə, bunun bir neçə səbəbi ola bilər.
Onun fikrincə, sürətli yerimək insanın daha az xroniki xəstəliyə malik olduğunu və mövcud xəstəliklərinin daha yaxşı nəzarətdə saxlanıldığını göstərə bilər.
Sağlamlıq pisləşdikdə isə yerimə sürəti azalan ilk funksional göstəricilərdən biri ola bilər.
Strenc Medical Xpress nəşrinə açıqlamasında bildirib ki, klinik şəraitdə daha yüksək yerimə sürəti, ehtimal ki, daha yaxşı sağlamlıq vəziyyəti ilə əlaqəlidir. Yerimə sürətinin azalması isə yıxılma, fiziki zəiflik, idrak qabiliyyətlərinin aşağı düşməsi, xəstələnmə və nəticədə ölüm riskinin artması ilə bağlı ola bilər.
Yerimə sürətini necə artırmaq olar?
Doktor Strenc daha sürətli yerimək istəyənlərə əvvəlcə özlərini rahat hiss etdikləri templə başlamağı, sonra isə dəqiqədə atdıqları addımların sayını tədricən artırmağı tövsiyə edir.
Onun sözlərinə görə, büdrəmə riskini azaltmaq baxımından qısa addımlarla yerimək uzun addımlarla yeriməkdən daha təhlükəsiz ola bilər.
Yeriyərkən bədən duruşuna da diqqət yetirmək vacibdir. Kürəyi düz saxlamaq, çiyinləri geriyə açmaq, bədəni rahat tutmaq və qolları hərəkət etdirmək məsləhət görülür.
Gündə 10 min addım atmaq mütləqdirmi?
Mütəxəssis hesab edir ki, sağlam qalmaq üçün hər kəsin mütləq gündə 10 min addım atması tələb olunmur.
Strenc əvvəlcə bir neçə gün ərzində gündəlik addım sayını izləməyi, sonra bu göstəricini 5–6 minə, daha sonra isə 7–8 minə çatdırmağa çalışmağı məsləhət görür.
“Əgər gündə 10 min addım atmaq üçün vaxtınız, imkanınız və şəraitiniz varsa, bu, əlbəttə, yaxşıdır. Amma məncə, gündə 7–8 min addım atmaq hədəflənməli olan göstəricidir”, – deyə o bildirib.
Sunay Aydın
