Polşa məhkəməsi 2022-ci ildə Baltik dənizində “Şimal axını” qaz kəmərlərinə qarşı törədilmiş partlayışlarda iştirakda şübhəli bilinən Ukrayna vətəndaşı Volodimir Z.-nin Almaniyaya təhvil verilməsinə qarşı hökm çıxarıb.
Almaniya mediası xəbər verir ki, məhkəmə, həmçinin 46 yaşlı şəxsin barəsində seçilmiş həbs qətimkan tədbirini də ləğv edib. Məlumata görə, Almaniya tərəfindən Avropa həbs orderi ilə axtarışa verildikdən sonra Varşava yaxınlığında saxlanılmış Volodımır Z. sentyabrdan istintaq təcridxanasında idi. Almaniyada prokurorluq onu 2022-ci ilin payızında Bornholm adası yaxınlığında “Şimal axını” kəmərlərinə partlayıcı maddələr yerləşdirmiş qrupun üzvü olmaqda ittiham edir.
İttihama əsasən, peşəkar dalğıc olan şübhəli şəxsə qarşı “partlayış törətmək” və “konstitusiyaya zidd diversiya” maddələri üzrə cinayət işi aparılır. Hadisə nəticəsində kəmərlərdə baş verən partlayışlar onların ciddi zədələnməsinə və qaz nəqlinin dayanmasına səbəb olmuşdu. Hücumdan sonra ümumilikdə dörd boru xəttindən üçündə dörd sızma nöqtəsi aşkarlanmışdı.
Xatırladaq ki, “Şimal axını-1” ilə Rusiya qazı Almaniyaya nəql edilirdi. Lakin partlayış vaxtı qaz axını dayandırılmışdı. “Şimal axını-2” isə Rusiyanın Ukraynaya qarşı müharibəsi səbəbindən hələ istismara verilməmişdi. Məsələ ilə bağlı Almaniya və Polşanın hüquq-mühafizə orqanları arasında əməkdaşlıq davam edir.
