Rusiya prezidenti Putinin ətrafı Britaniyanın sui-qəsd təhdidi səbəbindən ABŞ lideri Trampla Budapeştdə görüşməməsi barədə xəbərdarlıq edib.
AzPost bildirir ki, bu barədə “Daily Express” yazır.
Daha əvvəl ABŞ-da Xarici Kəşfiyyat Xidmətində (SVR) gizli xidmət edən Bezrukov Rusiya televiziyasında çıxış edərək “Budapeştə getməyin mənası yoxdur” deyib. O, Macarıstana səfərin “diqqətlə planlaşdırılan Britaniya əməliyyatının bir hissəsi ola biləcəyini” iddia edərək, Trampla görüşü Dubaya köçürməyi məsləhət görüb.
Keçmiş casus vəziyyətdən çox narahat olduğunu vurğulayıb və mümkün sui-qəsd cəhdini “real təhlükə” adlandırıb. Lakin o, iddialarını təsdiq edəcək heç bir sübut təqdim etməyib.
Andrey Bezrukov ABŞ-da 2010-cu ildə Anna Çapman və digər rus agentlərinin həbsi zamanı ifşa edilib. Mübadilədən sonra o, Rusiyaya qayıdıb, burada MGIMO-da professor və dövlətə məxsus “Rosneft” neft şirkətinin müşaviri olub. İndi 65 yaşı var, o, Rusiya televiziyasında beynəlxalq hadisələri fəal şəkildə şərh edir.
Xatırladaq ki, Rusiya prezidentinin mətbuat katibi Dmitri Peskov Putinin amerikalı həmkarı Donald Trampla Budapeştdə niyə görüşməyə razı olduğunu Rusiya dövlət başçısının Macarıstanın baş naziri Viktor Orbanla konstruktiv münasibətləri ilə izah edib.
“Prezident Trampın Orbanla kifayət qədər isti münasibəti var, prezident Putinin isə son telefon danışığı zamanı formalaşan qarşılıqlı anlaşmaya töhfə verən çox konstruktiv münasibətləri var”, – Peskov bildirib.
