Azərbaycanda mal ətinin orta qiyməti 1 kiloqram üçün 10,78 dollar təşkil edir.
Azpost.info bildirir ki, yaşayış xərcləri, daşınmaz əmlak qiymətləri və həyat keyfiyyəti göstəricilərini toplayan Numbeo məlumat bazasının qiymət reytinqinə əsasən, Azərbaycan bu göstərici ilə dünya ölkələri arasında 69-cu yerdə qərarlaşıb. Region ölkələri ilə müqayisədə Azərbaycanda mal əti Ermənistandan, Rusiyadan və Gürcüstandan ucuz, İrandan və Türkiyədən isə bahadır.
Reytinqə görə, Ermənistanda 1 kiloqram mal ətinin orta qiyməti 13,46 dollar, Rusiyada 12 dollar, Gürcüstanda 11 dollar, Azərbaycanda 10,78 dollar, İranda isə 9,66 dollardır. Türkiyədə bu göstərici 20,27 dollara çatır.
Beləliklə, təqdim olunan rəqəmlərə əsasən, Ermənistanda mal əti Azərbaycandan təxminən 25 faiz, Rusiyada 11 faiz, Gürcüstanda isə 2 faiz bahadır. Türkiyədə qiymət Azərbaycandakı göstəricidən təxminən 88 faiz yüksəkdir. İranda isə mal əti Azərbaycandan təxminən 10 faiz ucuzdur.
Dünyada mal əti ən çox hansı ölkələrdə bahadır?
Numbeo-nun qlobal reytinqində mal ətinin ən yüksək orta qiyməti İsveçrədə qeydə alınıb. Burada 1 kiloqram mal əti 42,99 dollara satılır.
Ən bahalı mal əti olan ilk 10 ölkə belə sıralanır:
- İsveçrə — 42,99 dollar
- İslandiya — 41,70 dollar
- Norveç — 32,33 dollar
- Cənubi Koreya — 26,01 dollar
- Lüksemburq — 25,99 dollar
- Sinqapur — 25,59 dollar
- İsrail — 25,54 dollar
- Finlandiya — 22,49 dollar
- Avstriya — 22,32 dollar
- Estoniya — 22,23 dollar
Reytinqdə mal ətinin ən ucuz olduğu ölkələr sırasında Pakistan və Boliviya göstərilir. Pakistanda 1 kiloqram mal ətinin orta qiyməti 5,05 dollar, Boliviyada isə 4,53 dollardır.
Qeyd edək ki, Numbeo məlumatları müxtəlif ölkələr üzrə toplanan qiymət məlumatlarına əsaslanır.
S.Abdulla
