StarexGlobal
Starex kargo şirkəti ilə bağlı vətəndaş narazılığı yaranıb. İddialara görə, Türkiyədən gələn bağlamanın dəyəri sistemdə səhvən 52 dollar əvəzinə 520 dollar kimi qeyd olunub. Nəticədə bağlama gömrük tərəfindən saxlanılıb və alıcıya bu barədə “eyni cinsdən bir neçə məhsul olduğu üçün” məlumat verilib.
AzPost xəbər verir ki, vətəndaşın sözlərinə görə, o, məsələni aydınlaşdırmaq üçün şirkətin müştəri xidmətləri ilə dəfələrlə əlaqə saxlayıb. Lakin hər dəfə “sorğunuza cavab veriləcək” cavabını alıb və proses xeyli vaxt aparıb. Müştəri daha sonra invoys sənədlərini əldə etmək üçün kargo terminalına üz tutmalı olub.
Uzun gözləmədən sonra məlum olub ki, problem məhsulların eyni cinsdə olması ilə deyil, invoysda qiymətin yanlış qeyd edilməsi ilə bağlı imiş. Bununla belə, müştəri bağlamanı ala bilmək üçün saxlama və anbar haqqı ödəməyə məcbur qalıb.
Vətəndaş bildirir ki, şirkət əməkdaşları məsələ həll olunduqdan sonra düzgün invoysu yalnız gömrükdən çıxdıqdan sonra göndəriblər. Onun sözlərinə görə, nə üzrxahlıq, nə də məsuliyyət etirafı bildirilməyib.
Hadisə müştərilər arasında Starex kargo şirkətinin xidmət keyfiyyəti və məsuliyyət yanaşması ilə bağlı narazılıqları bir daha gündəmə gətirib.
