“Polisə Dəstək”İB Şabran rayonunun Heydər Əliyev mərkəzində “İnsan Alveri cinayətlərinə qarşı” maarifləndirici tədbir keçirib.
QHT-lərə Dövlət Dəstəyi Agentliyinin maliyyə dəstəyi ilə Şabran rayonun Heydər Əliyev mərkəzində orta məktəbin yuxarı sinif şagirdləri və müəllimlərinin rayon ziyalılarının iştirakı ilə İnsan Alveri cinayətlərinin aradan qaldırılmasına dair maarifləndirici tədbir keçirilib.
Bu barədə “Polisə Dəstək” İB-nin mətbuat xidmətindən bildirlib.
Yığıncağı Şabran RİH-nin baş məsləhətcisi Turan xanım İskəndərova açmış, yığıncağın səbəbi ətrafında iştirakçılara məlumat verərək bildirmişdir ki, dünyada artıq insan alveri qurbanlarının səsləri eşidilir. Onlar görünməz zəncirlərlə bağlanmış cəmiyyətdən uzaqlaşdırılmış şəxslərdir.
Dünya miqyasında insan alverinin yeni formalara keçməsi, böhranlar, milli və dini zəmində baş verən münaqişələr fonunda artması müşahidə edilir. Bu artım hər birimizi güclü və koordinasiyalı hərəkət etməyə çağırır. Gücümüzü birlikdə bu sahəyə sərf etsək qarşısını ala bilərik.
Sonra layihə ətrafında “Polisə Dəstək” İB-nin sədri Şəmsəddin Əliyev çıxış etmişdir.
O, İnsan alveri cinayətlərini insanların şüuruna, ümidinə, gələcəyinə,hüquq və azadlıqlarına, insan ləyaqətinə edilən qəsd kimi qiymətləndirmiş, qurbanların müdafiəsini hər kəsin insanlıq borcu kimi zəruri hesab etmişdir.
Şəmsəddin Əliyev bu cinayətlərə qarşı üç əsas amilə uyğun –profilaktika, maarifləndirmə və qurbanların cəmiyyətə inteqrasiyası üzrə yəni, Protection (qurbanların qorunması) və Prevention (qorunma) – faktorlarının effektiv strategiyasını vurğulamış, müdafiə olmadan təqibin effektinin olmadığını, profilaktika aparılmadan da, qurbanların sayının azalmayacağını iştirakçıların diqqətinə çatdırmışdır.
O, iştirakçılara konkret addımların atılmasının vacib elementləri barədə də məlumat vermişdir:
Qurbanları yardıma ehtiyacı olan şəxslər kimi tanımaq;
Risklərin azalması məqsədilə uzaq bölgələrdə, məktəblərdə, iş yerlərində və onlayın platformalarda insan alverinin müxanizmləri haqqında davamlı təbliğat aparmaq, riskli işə qəbul praktikasına qarşı profilaktik tədbirlər həyata keçirmək və vətəndaşların yardım xətlərindən xəbərdar etmək;
Məlumat və monitorinq qurbanların real statistikasını, istismarın növlərini izləmək üçün güclü məlumat sistemləri lazımdır. Yalnız düzgün məlumat əsasında siyasət və mübarizə proqramlar, səmərə verəcək.
Layihə üzrə ekspert-qismində çıxış edən, hüquqşunas Aydın Kərimov qeyd etdi ki, insan alveri cinayətlərinin qurbanları bizdən təkcə yardım yox, həm də, ədalətin bərpasını, təhlükəsiz həyat sürmək üçün ikinci şans istəyirlər. Bizim öhdəliyimiz isə qurbanı qorumaq, qayğı ilə təqib etmək və gələcəkdə belə halların baş verməməsi üçün ümumi maraqlara cavab verən sistem yaratmaqdır. Bu iş isə hökumət, vətəndaş cəmiyyəti, beynəlxalq təşkilatlar, biznes və hər bir fərdin birlikdə fəaliyyətini tələb edir.
Tədbirdə Şabran RPŞ-nin İctimai Təhlükəsizlik Bölməsinin rəisi polis polkovnik-Leytenantı Hidayət Babayev, təçkilatın üzvü K.Sultanlı və digərləri insan alveri cinayətlərinin insanlıq ləyaqətinə zidd olduğunu, qurbanların yenidən cəmiyyətə qaytarması üçün hər birimizin mənəvi və praktik məsuliyyət daşımaları barədə fikirlərini bildirmişlər.
Sonda cəmiyyətə mesaj olaraq – “İnsan alveri Transmilli Mütəşəkkil Cinayətkarlığın ən təhlükəli cinayətlərindən və dünyanın qlobal problemi kimi XXI əsrdə də davam edir. Əşya kimi alınıb satılanlar,azadlığı məhdudlaşdırılanlar, ləyaqəti alçaldılanlar var. Yalançı vədlər nəticəsində hüquq və azadlıqlar məhdudlaşır. İnsan alverçiləri həssas təbəqəyə malik insanları daha tez ələ alır, onları digər cinayətlərin törədilməsinə cəlb edir və bu yolla da kriminal biznes əldə edirlər.
Zorakılıqlardan, aldadılmaqdan və istismardan qurtulmaq üçün birlikdə insan alverinə qarşı mübarizə aparaq, gələcəyimizi qoruyaq!”- şuarını videoçarx kimi səsləndirilməsi tövsiyə edilmiş, sonda iştirakçıların sualları cavablandırılmışdır.
