Gəncədə “İqlim dəyişmələri həlllərinin təşviqi” layihəsi çərçivəsində növbəti müzakirə görüşü keçirilib.
Gəncə şəhərində Azərbaycan Respublikasının Qeyri- Hökumət Təşkilatlarına Dövlət Dəstəyi Agentliyinin maliyyə dəstəyi ilə “Təşəbbüslərin İnkişaf Mərkəzi” İctimai Birliyi tərəfindən həyata keçirilən “İqlim dəyişmələri həlllərinin təşviqi” layihəsi çərçivəsində fəaliyyət göstərən işçi-ekspert qrupu tərəfdaş təşkilatların nümayəndələri və mütəxəssislərlə növbəti görüş keçirib.
Görüşdə iqlim dəyişikliklərinin təsirlərinin azaldılması və ekoloji dayanıqlığın artırılması istiqamətində həyata keçiriləcək fəaliyyətlərin planlaşdırılması ilə bağlı müzakirələr aparılıb. Layihə komandası ilə ekspertlər arasında əməkdaşlıq imkanlarının genişləndirilməsi, ali təhsil müəssisələri və digər maraqlı tərəflərlə qarşılıqlı fəaliyyətin gücləndirilməsi məqsədilə bir sıra təkliflər irəli sürülüb.
Tədbir zamanı layihə çərçivəsində nəzərdə tutulan növbəti 3 modul üzrə təlimlərin məzmunu, keçirilmə forması və metodik yanaşmaları təqdim olunub. Ekspertlər təlimlərin ali məktəb auditoriyalarında ekoloji biliklərin artırılması, gənclərin iqlim dəyişikliklərinə qarşı həll yönümlü təşəbbüslərə cəlb edilməsi və praktiki bacarıqların inkişaf etdirilməsi baxımından əhəmiyyətini qeyd ediblər.
