Mərkəzi Banka yeni baş direktor
“Azərbaycanda iqtisadi sistem, bazar alətləri və institutlarının zəif olduğuna görə Mərkəzi Bankın faiz qərarlarının iqtisadiyyata təsirləri çox az olur“.
AzPost bildirir ki, bu sözləri iqtisadçı -ekspert Natiq Cəfərli Mərkəzi Bankın faiz dəhlizinin bütün parametrləri üzrə azaltmaqla bağlı qərarını şərh edərkən deyib.
Xatırladaq ki, Mərkəzi Bankının İdarə Heyətinin qərarı ilə faiz dəhlizinin bütün parametrləri 0.25 faiz bəndi azaldılıb. Uçot dərəcəsi 6.75%, faiz dəhlizinin aşağı həddi 5.75%, faiz dəhlizinin yuxarı həddi isə 7.75% səviyyəsinə endirilib.
N.Cəfərlinin sözlərinə görə, adətən dünyada Mərkəzi Banklar faizi aşağı salanda pul (likvidlik) bolluğu artır, kredit faizləri aşağı düşür: “Bu formul Azərbaycanda işləmir. Məsələn, 2014-cü ildə uçot dərəcəsi 3,5% olub, amma, istehlak və biznes kreditləri ikirəqmli idi, 14-24% arası dəyişirdi. Devalvasiyalardan sonra, 2016-17-cı illərdə MB-ın uçot dərəcəsi 15% olsa da kredit faizləri 18-28% arası dəyişirdi. Yəni, uçot dərəcəsi 2 ildə 5 dəfəyə yaxın artdı, amma, kreditlərin faizi cəmi 4-5% arası artım göstərdi. 2019-da uçot dərəcəsi 9% civarında idi, kredit faizləri isə ciddi azalma göstərmədi”.
Ekspertin fikrincə, bu gün Azərbaycanda uçot dərəcəsi lap 4-5% də olsa, kreditlər ucuzlaşmayacaq: “Kreditin ucuzlaşması üçün depozit faizləri də azalmalıdır. İndi banklar 9-10% civarında depozitə faiz verirlər, onlar bu faizi 3-4%-ə salsalar, banklara pul qoyan olmayacaq, sərbəst pul kütləsi valyutaya gedəcək”.
N.Cəfərli deyib ki, Azərbaycanda Mərkəzi Bankın requlyativ alətlətlərinin işlək və iqtisadiyyata müsbət təsirlərinin olması üçün ilk növbədə indiki iqtisadi model dəyişməlidir.
