Meksikanın Salamanka şəhərində futbol matçından sonra silahlı şəxslər kütləvi atışma törədiblər. Nəticədə bir neçə nəfər ölüb.
AzPost bildirir ki, bu barədə Reuters məlumat yayıb.
Məlumatda deyilir ki, Meksikanın Salamanka şəhərində futbol matçından sonra qanlı hücum baş verib. Bir qrup silahlı şəxs meydançaya atəş açıb. Atışmada 11 nəfər ölüb, ən azı 12 nəfər müxtəlif dərəcələrdə yaralanıb. Hücumun səbəbi və motivi hələ də məlum deyil.
Yerli hakimiyyət orqanlarının məlumatına görə, hadisə uzun müddətdir regionu bürüyən zorakılıq dalğasının nümayişidir. Salamanka meri Sezar Prieto hadisəni ciddi sosial böhran kimi xarakterizə edərək, cinayətkar qrupların şəhərdə nəzarəti ələ keçirməyə çalışdığını, lakin hakimiyyət orqanlarının buna qarşı çıxmaqda qərarlı olduğunu vurğulayıb.
“Bu hadisə, təəssüf ki, ştatımızda, xüsusən də Salamankada davam edən zorakılıq dalğasını daha da şiddətləndirir”, – deyə o bildirib.
Quanaxuato ştatının Baş Prokurorluğu genişmiqyaslı araşdırmanın başlandığını elan edib. Bələdiyyə, ştat və federal səviyyələrdə hüquq-mühafizə orqanları təhlükəsizlik tədbirlərini gücləndirmək, yerli sakinləri qorumaq və hücuma görə məsul şəxsləri müəyyən etmək üçün səyləri əlaqələndirir. Reuters-in qeyd etdiyi kimi, Guanajuato uzun müddətdir ki, mütəşəkkil cinayətkar qrupların fəaliyyəti səbəbindən Meksikanın ən təhlükəli ştatlarından biri hesab olunur.
