Beynəlxalq Mülki Müdafiə Təşkilatının (BMMT) Daimi Katibliyi Azərbaycana qarşı son hücumlarla bağlı bəyanat yayıb.
Bəyanatda Azərbaycanın üzv dövlət kimi üzləşdiyi hadisələrlə bağlı dərin narahatlıq bildirilib, Azərbaycan Hökuməti və xalqı ilə tam həmrəylik ifadə edilib. Qeyd olunub ki, Azərbaycan mülki müdafiə və fövqəladə hallara hazırlıq sahəsində regional əməkdaşlığın gücləndirilməsinə töhfə verən ölkələrdən biridir və bu istiqamətdə BMMT çərçivəsində mühüm rol oynayır.
Təşkilat baş verən hadisələrdən zərər çəkən insanlara səmimi başsağlığı verərək vurğulayıb ki, bütün hallarda mülki əhalinin və həyati əhəmiyyətli xidmətlərin qorunması əsas prioritet olaraq qalmalıdır. Bildirilib ki, heç bir mülki şəxs qeyri-sabitlik və zorakılığın qurbanına çevrilməməlidir.
Bəyanatda qeyd edilib ki, qərargahı Cenevrədə yerləşən və humanitar prinsiplərə əsaslanan hökumətlərarası, qeyri-siyasi təşkilat olan BMMT üzv dövlətlərdə mülki müdafiə və fövqəladə hallara cavab sistemlərinin gücləndirilməsini dəstəkləməyə sadiqdir. Bu baxımdan mülki əhalinin həyatının və təhlükəsizliyinin qorunması hər zaman əsas prinsip kimi qəbul olunur.
BMMT, həmçinin Azərbaycanın təşkilat çərçivəsində konstruktiv rolunu yüksək qiymətləndirərək regional və beynəlxalq mülki müdafiə sahəsində əməkdaşlığın davam etdirilməsinin vacibliyini bir daha vurğulayıb.
