Məhəmməd Baqir Zolqadr hava zərbələri nəticəsində öldürülən Əli Laricaninin yerinə İranın Ali Milli Təhlükəsizlik Şurasının katibi təyin edilib.
Bu barədə İran Prezidenti Administrasiyasının rabitə məsələləri üzrə müavini “X” şəbəkəsində məlumat yayıb.
Qeyd edək ki, Məhəmməd Baqir Zolqadr İran İslam İnqilabı Keşikçiləri Korpusunun (SEPAH) istefada olan yüksək rütbəli hərbi komandiri və İranın Məsləhət Şurasının katibi olub.
1954-cü il təvəllüdlü Zulqadr təhlükəsizlik qüvvələrinin veteranıdır, İslam İnqilabı Keşikçiləri Korpusunun (SEPAH) qurucularından biri sayılır. O, komandir müavini və nizamsız müharibə qərargahının rəisi vəzifələrində çalışıb. Zulqadr həmçinin Mahmud Əhmədinejadın prezidentliyi dövründə təhlükəsizlik məsələləri üzrə daxili işlər nazirinin müavini vəzifəsini tutub. Qərb ona qarşı sanksiyalar tətbiq edib. O, terrorizmi dəstəkləməkdə və etirazları yatırmaqda ittiham olunur.
Təyinat Yaxın Şərqdə kəskin eskalasiyanın olduğu bir vaxta təsadüf edir. Bu qərar Tehranda mühafizəkar xəttin gücləndiyini göstərir. Zulqadrın İsrailə qarşı mövqeyi son dərəcə sərt hesab olunur. O, “müqavimət oxu”nun yaradılmasında iştirak edib və müttəfiq qrupların silahlandırılmasını dəstəkləyib.
