“Rusiyanın maraqlarına zərər vurmaq kimi heç bir məqsədimiz yoxdur, olmayıb və olmayacaq da“.
Azpost.info bildirir ki, bu sözləri Ermənistanın Baş naziri Nikol Paşinyan mayın 11-də jurnalistlərlə söhbətində bildirib.
O, bütün siyasətlərin açıq şəkildə aparıldığına və heç bir sui-qəsd gizlənmədiyini deyib. Paşinyan izah edib ki, Ermənistan balanslı xarici siyasət yürüdür və bunun əsas təməli qarşılıqlı hörmət və maraqların tanınmasıdır.
“Biz Ermənistanın dövlət maraqlarını rəhbər tutmağa və Rusiya ilə münasibətləri dərinləşdirməyə və inkişaf etdirməyə davam edirik. Bu münasibətlərdə qaçılmaz transformasiyanın baş verdiyini anlayırıq və mən bu transformasiyaya müsbət baxıram. Bu, siyasi zövq məsələsi deyil. Bəziləri bunun mənimlə və ya siyasi komandamızla əlaqəli olduğunu deyə bilər, amma bu belə deyil. Başa düşürəm ki, aydınlaşdırılmalı olan suallar, narahatlıqlar və incəliklər var. Bu məsələlər üzərində sakitcə, ölçülü-biçili, gərginliksiz, lazımsız eskalasiya olmadan işləməliyik.” – deyə Paşinyan qeyd edib.
O, Rusiya prezidenti ilə münasibətlərinin qarşılıqlı etimada əsaslandığını bildirib. Ən aktual məsələləri sakit, hörmətlə, dostcasına atmosferdə və arqumentlərə və faktlara əsaslanaraq müzakirə etdiklərini vurğulayıb.
“Mən bu məntiqi davam etdirəcəyəm. Həm Rusiya prezidentinə, həm də Rusiyaya hörmətimi bildirirəm. Eyni zamanda, biz Aİ ilə münasibətlərin dərinləşdirilməsi və Aİ üzvlüyü haqqında qanun çərçivəsində, yəni demokratik islahatlar yolu ilə irəliləyəcəyik”, – deyə Paşinyan vurğulayıb.
