Rəsmi Tehrana yaxın məlumatlı mənbə İranın uranın zənginləşdirilməsini 10 il müddətinə dayandırmaq təklifi ilə bağlı mediada yayılan məlumatları qəti şəkildə təkzib edib.
Azpost.info bildirir ki, Tasnim xəbər agentliyi ilə söhbətində mənbə bildirib ki, “Əl-Ərəbiyyə” telekanlının İranın uranın zənginləşdirilməsini 3,6 faizdən yuxarı səviyyədə 10 il müddətinə dayandırmağı təklif etməsi barədə xəbəri kökündən yanlışdır.
Mənbə həmçinin vurğulayıb ki, hazırkı vəziyyətdə hesabatların və danışıqların əsas diqqət mərkəzi yalnız “müharibənin bitməsi” məsələsidir.
Mənbə İran xəbər agentliyinə bildirib ki, nüvə məsələsi ilə bağlı heç bir detal müzakirə olunmur.
Bu məlumat Pakistan nümayəndə heyətinin yüksək vəzifəli İran rəsmiləri ilə bir neçə görüşdən sonra Tehranı tərk etməsindən sonra ortaya çıxıb. Pakistan Ordusunun Qərargah rəisi, feldmarşal Asim Munir Tehranda prezident Məsud Pezeşkian, Parlamentin sədri Məhəmməd Bağır Qalibaf və xarici işlər naziri Abbas Əraqçi də daxil olmaqla, yüksək vəzifəli İran rəsmiləri ilə bir sıra yüksək səviyyəli görüşlər keçirib.
Tərəflər gərginliyin daha da artmasının qarşısını almağa və ABŞ-İsrail müharibəsinin dayandırılması səylərini asanlaşdırmağa yönəlmiş son diplomatik təşəbbüslər barədə fikir mübadiləsi aparıblar.
Onlar həmçinin regional dialoq və diplomatiya vasitəsilə Qərbi Asiyada sülhün, sabitliyin və təhlükəsizliyin gücləndirilməsinin vacibliyini vurğuladılar. Feldmarşal Munirin səfəri, Pakistanın regional gərginliyin azaldılması təşəbbüsləri və İran-Amerika təmasları ilə bağlı davam edən diplomatik əlaqələri və vasitəçilik səyləri fonunda onun Tehrana son ikinci səfəridir.
