Pentaqonun UNO videolarını yaymasından dərhal sonra dini dünyada da böyük bir qalmaqal partlayıb. ABŞ-nin paytaxtı Vaşinqtonda Katolik Kilsəsinin baş yepiskopu, Cardinal Robert McElroy, kilsənin ən tanınmış ekzorsistlərindən (şeytan qovan keşişlərindən) biri olan Monsenyor Stiven Rossettini rəsmən vəzifəsindən kənarlaşdırıb.
Azpost.info bildirir ki, buna səbəb keşişin sosial şəbəkələrdə yaydığı və böyük müzakirələrə səbəb olan sensasiyalı bəyanatı olub.
Keşiş Rossetti yayımladığı videoda iddia edib ki, son zamanlar dünyada tez-tez görünən və Pentaqonun da təsdiqlədiyi UNO-lar əslində başqa planetdən gələn ağıllı varlıqlar deyil: “Bir ekzorsist kimi mən bu təhlükəni qeyd etməli idim. Şeytanlar və cinlər gizlənməyi sevirlər. Biz onların nə etdiyini bilməyəndə daha effektiv olurlar. Mənim şəxsi inancıma görə, bu UNO görüntülərinin çoxu, bəlkə də hamısı əslində cinlərin bəşəriyyəti manipulyasiya etmək üçün apardığı fəaliyyətdir.”
Kilsənin sərt reaksiyası
Kilsə rəhbərliyi isə bu açıqlamanı sərt şəkildə pisləyib. Yepiskopluğun bəyanatında bildirilir ki, keşişin UNO-ları birbaşa şeytani qüvvələrlə bağlaması kilsənin cinlər və ekzorsizm haqqındakı rəsmi elmi-dini təlimlərinə tamamilə ziddir və kilsənin nüfuzuna xələl gətirir. Qərara əsasən, keşiş həm şeytan qovma missiyasından məhrum edilib, həm də rəhbərlik etdiyi Mənəvi Yenilənmə Mərkəzi ilə kilsənin bütün əlaqələri kəsilib. Cəzalandırılan keşiş isə kilsə qaydalarını pozduğu üçün üzr istədiyini bəyan edib.
Katolik kilsəsi rəsmən bəyan edir ki, digər planetlərdə həyatın olmasına inanmaq kilsə təlimlərinə zidd deyil, lakin bunu mistik qüvvələrlə qarışdırmaq yolverilməzdir.
S.Abdulla
