Baş nazir Nikol Paşinyan parlament seçkilərində səs verib.
Bu barədə Ermənistan mediası məlumat yayıb.
“Xoşbəxtlikdən indi Azərbaycanla Ermənistan arasında sülh var”.
“Armenpress”in xəbərinə görə, bu barədə Paşinyan səsvermədən sonra jurnalistlərə açıqlamasında seçkilərin region üçün mümkün nəticələri barədə danışarkən deyib.
O, Gürcüstanla çox dərin münasibətlərin olduğunu bildirib.
“Əlbəttə ki, Türkiyə ilə münasibətlərin normallaşmasını və diplomatik əlaqələrin qurulmasını səbirsizliklə gözləyirəm”, – Baş nazir qeyd edib.
Paşinyan, həmçinin, Türkiyə ilə sərhədin, eləcə də dəmir yolu və avtomobil yollarının yaxın gələcəkdə yenidən açılacağına əminliyini ifadə edib.
Ermənistanda parlament seçkiləri üçün səsvermə başlayıb. Ölkə üzrə 2005 seçki məntəqəsi açılıb və onlar saat 20:00-a qədər açıq qalacaq.
Ermənistan Daxili İşlər Nazirliyinin məlumatına görə, 2 milyon 485 min 851 vətəndaşın səs vermək hüququ var.
Seçkilərdə iki siyasi blok – “Ermənistan” və “Güclü Ermənistan”, eləcə də “Vətəndaş Müqaviləsi”, “Çiçəklənən Ermənistan” və s. daxil olmaqla 16 partiya iştirak edir.
Xatırladaq ki, əvvəlki növbədənkənar parlament seçkiləri 2021-ci ildə keçirilib.
