Azərbaycana hər il orta hesabla 400-500 milyon ABŞ dolları dəyərində əczaçılıq məhsulları idxal edilir.
Azpost.info bildirir ki, Dövlət Gömrük Komitəsinin son rəsmi hesabatlarına əsasən, təkcə 2025-ci ilin 10 ayı ərzində ölkəyə 424,8 milyon dollar dəyərində (14,8 min ton) dərman və tibbi mallar gətirilib. Azərbaycanın daxili farmasevtika bazarı demək olar ki, 90%-dən çox xarici idxaldan asılıdır. Yerli istehsal isə son illər artsa da hələ ki daxili tələbatın kiçik bir hissəsini qarşılayır.
Azərbaycan dərman vasitələrini əsasən aşağıdakı ölkələrdən tədarük edir: Avropa İttifaqından Almaniya, Macarıstan, Fransa və İtaliyadan gəlir. MDB ölkələri üzrə isə Rusiya, Belarus və Ukrayna idxal olunur. Bundan savayı Türkiyə, Hindistan və İrandan dərman alırıq.
İdxal olunan dərmanların qiymətləri vahid qiymət siyasəti çərçivəsində Tarif Şurası tərəfindən tənzimlənir. Son qanunvericilik dəyişikliklərinə əsasən, dərman bazarında liberallaşdırma aparılıb, idxalın şaxələndirilməsi və paralel idxala icazə verilməsi ilə qiymətlərin optimallaşdırılması hədəflənib. Ölkəyə daxil olan hər bir dərman partiyası Səhiyyə Nazirliyinin Analitik Ekspertiza Mərkəzi tərəfindən laborator ekspertizadan keçirilməli və dövlət reyestrində qeydiyyatda olmalıdır.
A.Əliyev
