Azərbaycan Respublikasının Mədəniyyət Nazirliyinin maliyyə dəstəyi ilə Tarix sahəsində Maarifləndirməyə Dəstək İctimai Birliyi tərəfindən icra edilən “Rəqəmal Mədəni İrs: QR Bələdçi Şəbəkəsinin Yaradılması” layihəsi çərçivəsində Bakı şəhərində yerləşən bir sıra tarixi-memarlıq abidələri üzrə çəkiliş prosesi tamamlanıb.
Çəkilişlər Hacı Şəhla məscidi, Şakir ağa türbəsi, Balaxanı Qum hamamı, Ramana qalası, Ramana məscidi, Novruzqulu hamamı, Nizaməddin məscidi, Minarəli məscid, Nizami adına Ədəbiyyat Muzeyinin binası, Tuba Şahi məscidi və 1 №-li sanatoriya (XIX əsr) kimi mühüm mədəni irs obyektlərini əhatə edib.
Layihə nəticəsində toplanan videomateriallar və məlumatlar rəqəmsal platformada yerləşdiriləcək, hər bir obyekt üçün ayrıca QR kod hazırlanacaq. Bu sistem vasitəsilə istifadəçilər mobil cihazlarından birbaşa abidələr haqqında çoxdilli məlumat və video görüntülərə çıxış əldə edə biləcəklər.
