Dünyada müharibələr, geosiyasi gərginlik və təhlükəsizlik riskləri artdığı bir vaxtda ən təhlükəsiz və sakit ölkələrin siyahısı yenilənib.
İqtisadiyyat və Sülh İnstitutunun (Institute for Economics & Peace) hazırladığı 2026-cı il Qlobal Sülh İndeksi (Global Peace Index) 163 ölkəni təhlükəsizlik, daxili sabitlik, cinayət səviyyəsi, hərbiləşmə və beynəlxalq münaqişələrdə iştirak kimi göstəricilər əsasında qiymətləndirib.
Araşdırmaya görə, dünyanın ən sakit ölkələrinin əksəriyyəti Avropa və Okeaniya regionunda yerləşir.
1. İslandiya
İslandiya ardıcıl 19-cu dəfə dünyanın ən sakit ölkəsi seçilib. Ölkədə cinayət səviyyəsi son dərəcə aşağıdır, daimi ordusu yoxdur, dövlət institutlarına etimad yüksəkdir və sosial rifah sistemi güclüdür.
2. Yeni Zelandiya
Yeni Zelandiya siyasi sabitliyi, aşağı cinayət göstəriciləri və təhlükəsiz yaşayış mühiti ilə ikinci yerdə qərarlaşıb. Ölkə təbii fəlakətlərə hazırlıq və ictimai təhlükəsizlik sahəsində də yüksək qiymətləndirilir.
3. İsveçrə
Neytrallıq siyasəti ilə tanınan İsveçrə təhlükəsizlik, hüququn aliliyi və yüksək həyat keyfiyyəti sayəsində ilk üçlüyə daxil olub. Ölkə uzun illərdir dünyanın ən sabit dövlətlərindən biri hesab edilir.
4. Sloveniya
Sloveniya aşağı cinayət səviyyəsi, siyasi sabitlik və təhlükəsiz şəhərləri ilə reytinqdə dördüncü yeri tutub. Son illərdə ölkə Avropanın ən rahat yaşayış məkanlarından biri kimi tanınır.
5. İrlandiya
İrlandiya güclü iqtisadiyyatı, sabit siyasi sistemi və aşağı zorakılıq göstəriciləri ilə ən təhlükəsiz ölkələr sırasında yer alır.
6. Avstriya
Avstriya həm turistlər, həm də sakinlər üçün təhlükəsiz ölkələrdən biri hesab olunur. Cinayət göstəricilərinin aşağı olması və inkişaf etmiş sosial sistem ölkənin yüksək mövqeyini qorumasına kömək edib.
7. Sinqapur
Asiyanın ən yüksək mövqedə qərarlaşan ölkəsi olan Sinqapur sərt qanunvericiliyi, aşağı cinayət səviyyəsi və yüksək ictimai təhlükəsizlik standartları ilə ilk yeddilikdə yer alıb.
Reytinq necə hazırlanır?
Qlobal Sülh İndeksi hər il 163 ölkəni 20-dən çox göstərici üzrə qiymətləndirir. Bunlara aşağıdakılar daxildir:
Daxili təhlükəsizlik və cinayət səviyyəsi;
Terrorizm riski;
Silahlı münaqişələrdə iştirak;
Siyasi sabitlik;
Hərbi xərclər və hərbiləşmə səviyyəsi;
Qonşu ölkələrlə münasibətlər.
Mütəxəssislər bildirirlər ki, sülh təkcə müharibənin olmaması deyil. Yüksək həyat keyfiyyəti, hüququn aliliyi, güclü dövlət institutları və insanların özlərini təhlükəsiz hiss etməsi də bu göstəricinin əsas elementləridir.
