Plastik tullantılar dünyanın ən ciddi ekoloji problemlərindən biri hesab olunur. Hər il milyonlarla ton plastik çaylar və dənizlər vasitəsilə okeanlara çatır.
Ekoloqlar bildirirlər ki, insanların cəmi bir neçə dəqiqə istifadə etdiyi plastik butulka təbiətdə yüz illərlə qalır.
Plastik niyə yox olmur?
Adi plastik butulka təxminən 450 il ərzində tam parçalanır. Lakin bu müddətdə o tam yox olmur. Sadəcə mikroplastik hissəciklərə çevrilərək torpağa, suya və canlı orqanizmlərə qarışır.
BMT-nin Ətraf Mühit Proqramının məlumatına görə, hər il bir milyondan çox dəniz quşu və yüz minlərlə dəniz heyvanı plastik tullantılar səbəbindən tələf olur. Balıqlar və tısbağalar plastik hissəcikləri qida hesab edərək udurlar.
Mikroplastik artıq insan orqanizmində də aşkarlanıb
Son illərin elmi araşdırmaları göstərir ki, mikroplastik hissəcikləri insan qanında, ağciyərlərində və hətta plasentada belə aşkarlanıb. Alimlər bu hissəciklərin uzunmüddətli təsirlərini hələ də araşdırırlar.
Təkrar emal problemi
Dünyada istehsal olunan plastikin cəmi 9 faizi təkrar emal edilir. Qalan hissəsi ya zibilliklərə atılır, ya da ətraf mühitə yayılır. Ekoloqlar birdəfəlik plastikdən istifadənin azaldılmasını, təkrar istifadə edilən su qablarından yararlanmağı və tullantıları çeşidləməyi tövsiyə edirlər. Bir insanın kiçik dəyişiklikləri milyonlarla insan tərəfindən tətbiq olunduqda böyük ekoloji nəticələr verir.
Sunay
