İtaliyanın məşhur kino ulduzu Ornella Muti və qızı Naike Rivelli Rusiya vətəndaşlığı almaq üçün rəsmi müraciət etməyə hazırlaşırlar.
Azpost.info bildirir ki, bu barədə RİA-Novosti məlumat yayıb.
Naike Rivelli bildirib ki, bu addım onların Rusiyada özlərini həqiqətən evdə hiss etmələrinə imkan verəcək. “Rusiya vətəndaşlığı üçün müraciət edirik ki, özümüzü həqiqətən evimizdə hiss edək. Bizim rus köklərimiz var. Mənşəyimizdən, ailəmizdən və dostlarımızdan imtina edə bilmərik”, – deyə o bildirib.
Rivelli əlavə edib ki, bir çox italiyalılar Rusiya mədəniyyətinə və xalqına hörmətlə yanaşır. O, həmçinin koronavirus pandemiyası dövründə Rusiyanın İtaliyaya göstərdiyi yardımı xatırladıb.
Ailə gələcəkdə Moskvada və ya Sankt-Peterburqda daşınmaz əmlak almağı da nəzərdən keçirir. Onların sözlərinə görə, bu evdə digər qohumları da yaşaya biləcək.
Qeyd edək ki, bu, Ornella Mutinin Rusiya vətəndaşlığı almaq üçün ilk cəhdi deyil. Aktrisa 2022-ci ilin əvvəlində də lazımi sənədləri toplamağa başladığını açıqlamışdı. Lakin həmin vaxt proses başa çatdırılmamışdı.
Ornella Mutinin ana tərəfdən babası və nənəsi Sankt-Peterburqdan olub. Onlar 1917-ci il inqilabından sonra Estoniyaya köçüblər.
Aktrisa dəfələrlə Rusiyaya səfər edib, müxtəlif mədəni layihələrdə iştirak edib və rus kökləri ilə fəxr etdiyini açıq şəkildə bəyan edib. Rusiya mediasının məlumatına görə, onun Moskvada üçotaqlı mənzili də var.
