Yay aylarında müşahidə olunan nisbi durğunluqdan sonra payız mövsümündə Azərbaycanın daşınmaz əmlak bazarında aktivliyin artacağı gözlənilir. Azərbaycan Qiymətləndiricilər Cəmiyyətinin son təhlilləri və bazar iştirakçılarının qiymətləndirmələri göstərir ki, sentyabr ayından etibarən həm alqı-satqıda, həm də kirayə bazarında canlanma müşahidə olunacaq.
Ekspertlər hesab edirlər ki, bazarda kəskin qiymət sıçrayışları gözlənilməsə də, artım tendensiyası davam edəcək.
Qiymətlərdə 3-4 faizlik artım proqnozlaşdırılır
AQC-nin kompozit əmlak indeksinə əsasən, daşınmaz əmlak bazarı hazırda sabit artım mərhələsindədir. Bazarın strukturunda ciddi risklər müşahidə olunmur və qiymətlərin enməsi üçün fundamental əsaslar görünmür.
Qiymətləndirmələrə görə, payız aylarında yaşayış daşınmaz əmlakı üzrə qiymətlərin orta hesabla 3-4 faiz artacağı gözlənilir.
Bu artım xüsusilə yüksək tələbat olan ərazilərdə daha qabarıq hiss oluna bilər.
Ən çox kirayə mənzillər bahalaşa bilər
Payızın ən fəal seqmenti ənənəvi olaraq kirayə bazarı hesab olunur. Universitetlərdə yeni tədris ilinin başlaması, regionlardan Bakıya tələbə və işçi axınının artması kirayə mənzillərə tələbi yüksəldəcək.
Bazarda fəaliyyət göstərən mütəxəssislər hesab edirlər ki, sentyabr-oktyabr aylarında kirayə qiymətlərində mövsümi bahalaşma müşahidə ediləcək. Ən çox tələbin metro stansiyalarına yaxın yerləşən 1 və 2 otaqlı mənzillərə olacağı proqnozlaşdırılır.
Torpaq bazarı yenə lider olacaq
AQP-nin hesabatına görə, son aylarda ən yüksək artım tempi torpaq bazarında qeydə alınıb. Ekspertlər hesab edirlər ki, bu tendensiya payızda da davam edəcək.
Buna səbəb fərdi yaşayış evlərinin tikintisinə marağın artması, eləcə də tikinti şirkətlərinin yeni layihələr üçün torpaq sahələrinə tələbatının yüksəlməsidir.
Yeni tikililər qiymət üstünlüyünü saxlayır
Hazırda yeni tikililərdə mənzillərin median satış qiyməti kvadratmetr üzrə orta hesabla 2 750 manat təşkil edir.
Ekspertlərin fikrincə, yeni və köhnə tikililər arasında qiymət balansı qorunsa da, müasir yaşayış komplekslərinə maraq daha yüksək olaraq qalır. Yeni tikililərdə inşaat xərclərinin artması satış qiymətlərinə də təsir göstərir.
Qiymətlərin artmasının əsas səbəbləri
Mütəxəssislər qiymətlərin yüksəlməsini bir neçə amillə izah edirlər.
Bunlar arasında yay mövsümündən sonra bazarın canlanması, tikinti materiallarının bahalaşması, Bakının mərkəzi hissəsində yeni tikinti layihələrinin məhdudlaşması, regionlardan Bakı və Abşerona davam edən miqrasiya, bəzi vasitəçilərin mövsümi qiymət artımı cəhdləri əsas rol oynayır.
Ekspertlər bildirirlər ki, təklifin məhdud, tələbin isə yüksək qalması qiymətlərin aşağı düşməsinə imkan vermir.
İpoteka bazarında artım tempi zəifləyir
Müsbət dinamika ilə yanaşı, bazarda müəyyən risklər də qalır.
Son dövrdə ipoteka portfeli böyüsə də, yeni verilən kreditlərin artım tempi əvvəlki illərlə müqayisədə zəifləyib. Bundan əlavə, faiz dərəcələrinin yüksək qalması bir çox ailənin ipoteka hesabına mənzil alma imkanlarını məhdudlaşdırır.
Ekspertlər hesab edirlər ki, ipoteka bazarında əlavə stimullaşdırıcı mexanizmlər tətbiq olunmasa, bu, alıcı fəallığına müəyyən təsir göstərə bilər.
İnvestorların marağı bölgələrə yönəlir
Son aylarda investisiya meyillərində də dəyişiklik müşahidə olunur. Əvvəllər əsas diqqət Bakıda mənzil alışına yönəlirdisə, indi investorlar turizm potensialı yüksək olan regionlarda torpaq sahələri və fərdi yaşayış evlərinə daha çox maraq göstərirlər.
Qəbələ, Şəki, Quba, Qusar, İsmayıllı və Lənkəran kimi bölgələr investisiya baxımından daha cəlbedici hesab olunur.
Mövcud göstəricilər və ekspert proqnozları onu deməyə əsas verir ki, 2026-cı ilin payızında Azərbaycanın daşınmaz əmlak bazarında kəskin qiymət sıçrayışı gözlənilmir. Bununla belə, mövsümi aktivliyin artması, tikinti xərclərinin yüksəlməsi və təklifin məhdud qalması fonunda qiymətlərin orta hesabla 3-4 faiz bahalaşacağı ehtimal edilir.
Ən böyük canlanmanın kirayə mənzil və torpaq bazarında olacağı, yeni tikililərin isə bazarın əsas hərəkətverici seqmenti olaraq qalacağı proqnozlaşdırılır. Bu baxımdan, payız ayları həm mənzil almağı planlaşdıranlar, həm də investisiya qoymaq istəyənlər üçün bazarı diqqətlə izləməli olduqları dövr olacaq.
S.Abdulla
