ABŞ Prezidenti Donald Tramp İrana qarşı planlaşdırılan genişmiqyaslı hərbi əməliyyatdan başlanmasına təxminən bir gün qalmış imtina edib.
Azpost.info bildirir ki, bu barədə İsrailin 12-ci telekanalı məlumat yayıb.
Telekanalın məlumatına görə, hücuma hazırlıq Trampın Ağ Evdə İsrailin Baş naziri Benyamin Netanyahu ilə görüşündən bir gün sonra – çərşənbə günü başlayıb.
ABŞ Mərkəzi Komandanlığı İranın enerji infrastrukturuna məxsus obyektlərə zərbə endirilməsi planını hazırlayıb. İddialara görə, İsrail də bu əməliyyatda iştirak etməli idi.
Amerikalı rəsmi telekanala bildirib ki, İsrail tərəfi Vaşinqtona xəbərdarlıq edib: əgər zərbə İran iqtisadiyyatına və hakimiyyət strukturlarına ciddi ziyan vurmayacaqsa, belə əməliyyatın keçirilməsinin mənası yoxdur.
Cümə və şənbə günləri Qətər İran, ABŞ və Oman nümayəndələrinin iştirakı ilə intensiv danışıqlar apararaq gərginliyin artmasının qarşısını almağa və Ormuz boğazının açılmasına nail olmağa çalışıb.
Mənbələrin sözlərinə görə, Doha Trampdan Tehranla razılıq əldə etmək üçün əlavə bir gün vaxt istəyib və ABŞ Prezidenti bu xahişlə razılaşıb.
Daha sonra Qətər ABŞ liderinə İranın Ormuz boğazının açılması ilə bağlı təklifi qəbul etdiyini bildirib.
Eyni zamanda, Səudiyyə Ərəbistanının vəliəhdi Məhəmməd bin Salman da Trampı İrana zərbə endirmək planından imtina etməyə çağırıb.
Bundan sonra Donald Tramp Truth Social sosial şəbəkəsində bildirib ki, İranın Ormuz boğazını açmağa və nüvə proqramını dayandırmağa razılıq verməsindən sonra hərbi əməliyyatın ləğvi barədə qərar qəbul edib.
