Müasir smartfonlar təxminən 5 il ərzində aktual qala bilir. Buna görə də cihazı hər il yenisi ilə əvəz etmək artıq əksər istifadəçilər üçün məntiqli hesab edilmir.
Azpost.info bildirir ki, bu nəticəyə ZDNET nəşrinin jurnalistləri mobil texnologiyaların inkişaf tempi və istehsalçıların proqram təminatı dəstəyi müddətini təhlil etdikdən sonra gəliblər.
Mütəxəssislərin fikrincə, bu gün smartfonun uzunömürlü olmasını müəyyən edən əsas amil prosessorun gücü deyil, əməliyyat sistemi və təhlükəsizlik yeniləmələrinin nə qədər müddət təqdim olunmasıdır. Texniki cəhətdən güclü telefon belə yeniləmələr dayandırıldıqdan sonra tədricən aktuallığını itirir.
Araşdırmada qeyd olunur ki, son illərdə smartfon texnologiyalarının inkişaf tempi xeyli zəifləyib. Kameralar, ekranlar və prosessorlar təkmilləşsə də, ardıcıl modellər arasındakı fərq adi istifadəçilər üçün çox vaxt nəzərə çarpmır.
İstisna yalnız süni intellekt funksiyalarının tətbiqi olub. İstehsalçılar sinxron tərcümə, generativ köməkçilər və fotoların avtomatik redaktəsi kimi imkanlar təqdim etdikdən sonra bazar yenidən kiçik və mərhələli yeniliklər dövrünə qayıdıb.
Məqalədə vurğulanır ki, Samsung və Google-un bəzi flaqman modelləri artıq 7 ilədək, Apple isə bir çox iPhone modelini uzun müddət proqram yeniləmələri ilə dəstəkləyir.
Bundan əlavə, 2025-ci ilin iyun ayından Avropa İttifaqında qüvvəyə minən yeni qaydalara əsasən, istehsalçılar satışdan çıxarıldıqdan sonra da modellər üçün ən azı 5 il proqram yeniləmələri təqdim etməlidirlər. Bu isə bəzi cihazların ümumi dəstək müddətini 7–8 ilə qədər uzada bilər.
Ekspertlər bildirirlər ki, 5 il smartfonun mütləq dəyişdirilməli olduğu anlamına gəlmir. Əgər cihaz təhlükəsizlik yeniləmələri alır, gündəlik işlərin öhdəsindən gəlir və ciddi nasazlığı yoxdursa, onu daha uzun müddət istifadə etmək mümkündür.
Araşdırmaya görə, smartfonlarda ən tez köhnələn hissə akkumulyator olur. Təxminən 3 ildən sonra batareyanın tutumu nəzərəçarpacaq dərəcədə azalır. Lakin əksər hallarda batareyanın dəyişdirilməsi yeni telefon almaqdan xeyli ucuz başa gəlir və cihazın istifadə müddətini daha bir neçə il uzada bilir.
