Bakının premium daşınmaz əmlak bazarının əsas ünvanlarından sayılan “Sea Breeze” layihəsində mənzil qiymətləri geniş intervalda dəyişir. Eyni ərazidə yerləşən yaşayış komplekslərində satış qiymətləri konsepsiya, mənzilin sahəsi, otaq sayı və təqdim olunan xidmətlərdən asılı olaraq yüz minlərlə manat fərqlənir. Son qiymət siyahısı göstərir ki, “Sea Breeze”də ən münasib mənzil 161 min manatdan başlayır, bəzi premium layihələrdə isə qiymətlər 1,5 milyon manatı ötür.
Müqayisə göstərir ki, ən aşağı başlanğıc qiyməti “Sea Breeze Reportage Heights” layihəsində təklif olunan birotaqlı mənzillərə aiddir. Burada qiymətlər 161 min 287 manatdan başlayır.
Bir otaqlı mənzillər üzrə digər layihələrdə qiymətlər belədir:
- Marina Bay – 163 min 812 manat;
- Port D’Azur – 185 min 782 manat;
- Arabian Ranches – 209 min 374 manat;
- Paradise – 231 min 557 manat;
- Palazzo Del Mare – 254 min 660 manat;
- Marina Village – 333 min 506 manat;
- BRABUS ISLAND Baku – 353 min 657 manat;
- Palm Beach – 354 min 152 manat;
- Premium Residence – 412 min 131 manat.
İkiotaqlı mənzillərin qiyməti 239 min manatdan başlayır
İkiotaqlı mənzillər üzrə ən aşağı qiymət Monaco Residence layihəsində qeydə alınıb. Burada mənzillər 239 min 292 manatdan satışa çıxarılıb.
Ən yüksək başlanğıc qiyməti isə BRABUS ISLAND Baku layihəsindədir. Burada ikiotaqlı mənzillərin qiyməti 658 min 920 manatdan başlayır.
Üçotaqlı mənzillərdə fərq 1 milyon manata yaxınlaşır
Üçotaqlı mənzillər arasında ən münasib qiymət Lighthouse 2 layihəsindədir – 277 min 652 manat.
Ən yüksək qiymət isə Palm Beach kompleksində qeydə alınıb. Burada üçotaqlı mənzillərin başlanğıc qiyməti 1 milyon 255 min 416 manatdır.
Bu, eyni yaşayış məkanında yerləşən layihələr arasında təxminən 1 milyon manatlıq qiymət fərqi olduğunu göstərir.
Dördotaqlı mənzillər 1,5 milyon manatı keçir
Dördotaqlı mənzillər təklif edən layihələr arasında da qiymətlər ciddi fərqlənir.
Ən münasib variant Arabian Ranches layihəsindədir və 519 min 125 manatdan başlayır.
Bunun əksinə, Lighthouse 2 layihəsində dördotaqlı mənzillərin qiyməti 1 milyon 529 min 685 manata çatır.
Qiymətlər niyə bu qədər fərqlənir?
Əmlak bazarı üzrə mütəxəssislərin fikrincə, eyni ərazidə belə qiymət fərqlərinin yaranmasına bir neçə amil təsir göstərir:
layihənin memarlıq konsepsiyası;
dənizə yaxınlıq və mənzərə;
tikinti materiallarının keyfiyyəti;
təqdim olunan infrastruktur və xidmətlər;
brend tərəfdaşlıqları və premium dizayn.
Məsələn, dünya brendləri ilə əməkdaşlıq çərçivəsində inşa edilən layihələrdə qiymətlər digər komplekslərlə müqayisədə daha yüksək olur.
Premium bazarda seçim imkanları genişlənir
Son qiymət siyahısı göstərir ki, “Sea Breeze” daxilində müxtəlif büdcələrə uyğun seçimlər mövcuddur. Bir tərəfdən 200 min manata yaxın mənzillər təklif edilir, digər tərəfdən isə eksklüziv layihələrdə qiymətlər milyonlarla manat səviyyəsinə yüksəlir.
Bu da alıcılara eyni yaşayış məkanında həm investisiya, həm də daimi yaşayış məqsədilə fərqli qiymət seqmentlərindən seçim etmək imkanı yaradır.
