Ukraynada yaxın vaxtlarda Avropa İttifaqına üzvlüklə bağlı referendum keçirilsəydi, vətəndaşların 69,2 faizi ölkənin Aİ-yə qoşulmasını dəstəkləyərdi.
Azpost.info bildirir ki, bu nəticə “Sotsis” sosioloji qrupunun keçirdiyi sorğuda ortaya çıxıb. Bu barədə “Yevropeyskaya Pravda” qəzeti yazıb.
Sorğuda iştirak edənlərin 22,2 faizi Ukraynanın Aİ-yə üzvlüyünün əleyhinə səs verəcəyini bildirib. Daha 8,7 faiz isə səsvermədə iştirak etməyəcəyini və ya cavab verməkdə çətinlik çəkdiyini qeyd edib.
Bununla yanaşı, Avropaya inteqrasiyaya dəstək əvvəlki bir sıra sorğularla müqayisədə azalıb. Lakin göstərici son iki ilin ən aşağı səviyyəsinə düşməyib.
Ukraynanın NATO-ya üzvlüyü ilə bağlı referendum keçirilsəydi, respondentlərin 61,2 faizi lehinə səs verərdi. Əleyhinə olanların payı isə 29,5 faiz təşkil edib.
Sorğu iştirakçılarının daha 9,4 faizi səsvermədə iştirak etməyəcəyini və ya mövqeyini müəyyənləşdirmədiyini bildirib.
NATO-ya üzvlüyə dəstək “Sotsis” qrupunun əvvəlki iki araşdırması ilə müqayisədə bir qədər artıb. Bununla belə, uzunmüddətli dövrdə bu istiqamətdə də dəstəyin azalması tendensiyası müşahidə olunur.
Sorğu 28 iyul – 2 avqust 2026-cı il tarixlərində 2000 nəfər arasında keçirilib. Tədqiqatın xəta payı 2,6 faizə qədərdir.
Bundan əvvəl “Rating Group”un iyun ayında keçirdiyi sorğuda Ukraynanın Aİ-yə üzvlüyünə dəstək daha yüksək olub. Həmin araşdırmaya əsasən, respondentlərin 79 faizi Aİ-yə, 63 faizi isə NATO-ya üzvlüyü dəstəkləyib.
Eyni zamanda, Polşada iyul ayında aparılan araşdırma göstərib ki, polyakların yarıdan çoxu Ukraynanın Avropa İttifaqına daxil olmasının əleyhinədir.
