İyul ayında ABŞ-ın Səudiyyə Ərəbistanından neft alışının həcmi sıfıra enib. “Bloomberg”in məlumatına görə, bir təqvim ayı ərzində Səudiyyə neftinin ABŞ-a tədarükünün tamamilə dayanması 1985-ci ildən bəri ilk dəfə qeydə alınıb.
Mövcud məlumatlara əsasən, hələ aprel ayında Vaşinqton Ər-Riyaddan gündəlik 600 min bareldən çox neft alırdı.
Lakin indi analitiklərin bildirdiyinə görə, Yaxın Şərqdəki münaqişə fonunda Hörmüz boğazında gəmiçiliklə bağlı yaranan problemlər ABŞ-ın neft emalı zavodlarını alternativ xammal mənbələri axtarmağa vadar edib.
Amerika şirkətləri xüsusilə ABŞ ərazisində hasil olunan yüngül neft növlərinə üstünlük verməyə başlayıblar.
Hesabata görə, yaranmış vəziyyətdən nəzərəçarpacaq dərəcədə Venesuela da faydalanıb. İyul ayında Venesuelanın ABŞ-a neft ixracı gündəlik təxminən 600 min barelə çatıb. İlin əvvəlində isə bu göstərici cəmi 100 min barel ətrafında olub.
Qeyd edək ki, ABŞ və İsrailin İrana qarşı hərbi əməliyyatı fevralın sonunda başlayıb. İyunda Vaşinqton və Tehran arasında bütün istiqamətlərdə, o cümlədən Livanda atəşin dərhal dayandırılmasını nəzərdə tutan memorandum imzalanıb.
Lakin artıq 8 iyul gecəsi ABŞ tərəfi İran ərazisinə zərbələri bərpa edib. Vaşinqton bunu Tehran tərəfindən Hörmüz boğazında hərəkət azadlığı ilə bağlı razılaşmaların yerinə yetirilməməsi ilə əsaslandırıb.
