ABŞ hökumətinin məxfilikdən çıxarılan arxivləri yerdənkənar sivilizasiyaların mövcudluğu ilə bağlı uzun illərdir davam edən mübahisələri yenidən gündəmə gətirib. Buna səbəb 1960-cı illərdə Braziliyada içərisində ölmüş yadplanetli kosmonavtın olduğu iddia edilən sirli metal kürənin aşkarlanması barədə məlumatlar olub.
Bu barədə Mirror məlumat yayıb.
Braziliyada sirli kürə iddiası
Hadisənin tarixi 1963-cü ilə gedib çıxır. Həmin vaxt Braziliyanın Konde yaşayış məntəqəsində yerli radiostansiyalar nəhəng bir kürənin yerə düşməsi barədə sensasion xəbər yayıblar.
Şahidlərin sözlərinə görə, obyektin içərisində xüsusi kostyum geyinmiş insanabənzər varlıq olub. Onun üzərində isə insanlar üçün tamamilə anlaşılmaz yazılar və simvollar olduğu iddia edilib.
Məlumat qısa müddətdə yerli mediada geniş yayılıb və NASA, ABŞ Müdafiə Nazirliyi və Dövlət Departamentinin diqqətini cəlb edib. Bundan sonra ABŞ-ın Rio-de-Janeyrodakı səfirliyi hadisənin təfərrüatlarının araşdırılması üçün rəsmi teleqram göndərib.
Lakin diplomatik qurumlar tezliklə həmin ərazidə nə hərbi, nə də mülki aviasiya uçuşunun həyata keçirilmədiyini müəyyən ediblər. Səfirlik daha sonra hadisənin əvvəlcədən hazırlanmış saxtakarlıq olduğunu açıqlayıb.
Hadisə yerinə gedən jurnalistlər və hökumət araşdırmaçıları isə qeyri-adi obyektin düşməsini həqiqətən görən heç bir şahid tapa bilməyiblər. O dövrdə ictimai təhlükəsizlik naziri insanların adi meteoroloji zondunu UFO hesab etmiş ola biləcəyini ehtimal edib. Lakin bu versiya da rəsmi şəkildə təsdiqlənməyib.
41 məxfi sənəddə nə var?
Məxfilikdən çıxarılan sənədlərin ümumi sayı 41 fayldır və onların arasında UFO-larla bağlı müxtəlif maraqlı məlumatlar yer alır.
Sənədlərdən birində ABŞ Hərbi Dəniz Qüvvələrinin Fotoqrafik Şərh Mərkəzinin Montana və Yuta ştatlarında çəkilmiş müəmmalı görüntülərlə bağlı apardığı təhlildən bəhs edilir.
Hərbi ekspertlər fotolarda görünən obyektlərin nə təbii hadisələrə, nə də məlum uçuş aparatlarına bənzədiyini bildiriblər.
Başqa bir məxfi sənəddə isə 2021-ci ilin sentyabrında AC-130J hərbi təyyarəsinin ekipajının qarşılaşdığı hadisə təsvir olunur.
Hərbçilər 25 işıqlı kürə görüb
Sənədə görə, xüsusi əməliyyat qüvvələrinin ekipaj üzvləri havada eyni vaxtda 25 işıqlı kürə müşahidə ediblər.
İddialara əsasən, bu obyektlər çox yüksək sürətlə hərəkət edib, aqressiv manevrlər həyata keçirib və hətta hərbi təyyarənin top atəşinə reaksiya veriblər.
ABŞ Federal Təhqiqatlar Bürosunun məxfilikdən çıxarılan arxivlərində isə daha yeni şahid ifadələri də yer alır. Bu ifadələrdə ABŞ-ın qərbindəki dağ silsilələrinin üzərində yüksək sürətlə hərəkət edən sirli qırmızı işıqlardan bəhs olunur.
Bununla belə, sənədlərdəki bu məlumatların yerdənkənar sivilizasiyaların mövcudluğunu sübut etdiyi barədə rəsmi nəticə yoxdur. Məxfi arxivlərin açılması isə uzun illərdir cavabsız qalan UFO hadisələri ilə bağlı müzakirələri yenidən alovlandırıb.
