Həftənin sonunda Hörmüz boğazından gəmi keçidi əvvəlki orta göstəricilərdən aşağı olaraq qalır. Buna ABŞ və İran arasında su yoluna nəzarətlə bağlı dəyişkən gərginlik təsir göstərir.
Bu barədə Reuters məlumat yayıb.
Dəniz nəqliyyatını izləyən Kpler şirkətinin məlumatına görə, cümə axşamı Hörmüz boğazından xammal daşıyan gəmilərin keçidi bir qədər artıb. Lakin göstərici avqust ayı üzrə gündəlik orta göstəricidən – 12 gəmidən aşağı olub.
Kpler-in məlumatlarına əsasən, cümə axşamı boğazdan 9 gəmi keçib. Bir gün əvvəl isə bu rəqəm 5 olub.
Keçən gəmilərdən 5-i Fars körfəzinə daxil olub, 4-ü isə Oman körfəzinə doğru hərəkət edib. Gəmilərin əksəriyyəti İranın gəmiçilik kanalından istifadə edib.
Eyni zamanda, statistikaya görə, cümə axşamı Bab əl-Məndəb boğazından transponderləri aktiv olan 19 xammal daşıyan gəmi keçib. Bu göstərici bir gün əvvəlki 20 gəmi ilə müqayisədə nisbətən sabit qalıb.
Qeyd olunur ki, bu statistikaya strateji əhəmiyyət daşıyan boğazlardan transponderlərini söndürərək keçən gəmilər daxil edilmir.
