Mətbuat Şurasının sədri Rəşad Məcid kiber dələduzluq cəhdi ilə üzləşdiyini açıqlayıb.
Rəşad Məcid sosial şəbəkədə paylaşım edərək bildirib ki, dələduzlar bu dəfə kifayət qədər inandırıcı üsuldan istifadə ediblər. Belə ki, əvvəlcə ona nazir müavini olduğunu düşündüyü şəxsin adından mesaj gəlib.
“Salam, Rəşad müəllim, necəsiz?” – mesaj belə başlayıb.
Rəşad Məcid yazışma zamanı zəng etməyi təklif edib. Qarşı tərəf isə tədbirdə olduğunu və danışa bilmədiyini bildirib. Daha sonra ona “kapitan Əzizov Əkbər Rafiq oğlu”nun zəng edəcəyi və onunla görüşməyin lazım olduğu deyilib.
Bir qədər sonra Rəşad Məcidə “Akbar Azizov” adı ilə normal telefon nömrəsindən zəng gəlib. Rus dilində danışan şəxs ondan əvvəl adı çəkilən şəxsin onunla danışıb-danışmadığını soruşub və görüşmək lazım olduğunu bildirib.
Rəşad Məcid tədbirdə olduğunu, saat 16:00-da işinin bitəcəyini deyib. Həmin vaxt zəng etsə də, qarşı tərəf cavab verməyib. Daha sonra özü zəng edərək həmin gün məşğul olduğunu və sabah əlaqə saxlayacağını bildirib.
Mətbuat Şurasının sədri qeyd edib ki, hadisə zamanı müəyyən şübhəli məqamlar olsa da, istifadə edilən telefon nömrələrinin və təqdim olunan məlumatların inandırıcılığı üstün gəlib.
“Axşam bir tədbirdə millət vəkilləri ilə görüşürəm. Söz düşür, sən demə, onlara da parlament rəhbərliyinin adından, rəhbər şəxslərin səsinə bənzədilən səslə zənglər gəlir və s.” – deyə Rəşad Məcid bildirib.
Onun sözlərinə görə, bu hadisə süni intellektin inkişafı fonunda dələduzluq üsullarının necə dəyişə biləcəyini bir daha göstərir.
Rəşad Məcid iki həftə əvvəl Bill Qeytsin süni intellektin inkişafı və gələcəklə bağlı bədbin proqnozlarından birini paylaşdığını xatırladıb. O, indi isə həmin xəbərdarlıqlardan birinin praktik nümunəsi ilə qarşılaşdığını qeyd edib.
“Bill Qeytsin inandırıcı fırıldaqçılarla bağlı xəbərdarlığı çox çəkmədi, gerçəkləşdi”, – deyə Mətbuat Şurasının sədri yazıb.
Rəşad Məcid bildirib ki, hazırda “kapitan Əzizov Əkbər Rafiq oğlu”nun yenidən nə vaxt zəng edəcəyini gözləyir.
“Belə başa düşürəm, bu, hələ başlanğıcdır. Bundan sonra daha inandırıcı fırıldaq cəhdləri ilə də üzləşəcəyik. Diqqətli, çevik və ayıq olmalıyıq”, – deyə o vurğulayıb.
Mətbuat Şurasının sədri hadisəni ictimailəşdirməkdə məqsədinin digər şəxsləri də mümkün oxşar cəhdlərə qarşı xəbərdar etmək olduğunu bildirib.
Bu hadisədə diqqət çəkən məqam isə dələduzların yalnız ad və telefon nömrələrindən deyil, vəzifəli şəxslərin kimliyindən, fotoşəkillərindən və hətta səsə bənzətmə imkanlarından istifadə etməsidir. Bu isə gələcəkdə saxta zəng və yazışmaların həqiqidən ayırd edilməsini daha da çətinləşdirə bilər.
Bu səbəbdən tanınmış və vəzifəli şəxslərin adından gələn mesaj və zənglərdə belə, məlumatı başqa rabitə kanalı ilə yoxlamaq, xüsusilə pul, sənəd, görüş və digər həssas məsələlərlə bağlı tələblərə tələsmədən yanaşmaq tövsiyə olunur.
