Zəngəzur dəhlizi Orta Dəhlizin yeni istiqaməti kimi xüsusi əhəmiyyət daşıyır.
Bunu Azərbaycanın xarici işlər naziri Ceyhun Bayramov Bakıda Türkiyənin xarici işlər naziri Hakan Fidanla birgə keçirdiyi mətbuat konfransında deyib.
Nazir bildirib ki, Azərbaycanın əsas hissəsində Ermənistanla sərhəd istiqamətində avtomobil yolunun tikintisi üzrə işlərin 95 faizi, dəmir yolu layihəsinin isə 75 faizi tamamlanıb.
Onun sözlərinə görə, hər iki layihənin 2027-ci ildə başa çatdırılması nəzərdə tutulur.
Naxçıvan istiqamətində də işlər başlayıb
Ceyhun Bayramov qeyd edib ki, hazırda Naxçıvanda dəmir yolunun yenidən qurulması ilə bağlı işlərə başlanılıb.
Nazir bildirib ki, Türkiyə-Naxçıvan dəmir yolunun 42 kilometrlik hissəsi Ermənistan ərazisinə düşür və bu hissə Zəngəzur dəhlizinin bir parçasıdır.
“Burada danışıqlar ABŞ və Ermənistan arasında həyata keçirilir. Bu, Ermənistan ərazisi sayılsa da, giriş və çıxış Azərbaycandan həyata keçiriləcək”, – Bayramov deyib.
Onun sözlərinə görə, layihələndirmə işləri bu il başa çatmalıdır. Fiziki işlərin isə 2027-ci ildə başlanması nəzərdə tutulur.
“Avropadan Türkiyə və Azərbaycan üzərindən bağlantı yaranacaq”
Ceyhun Bayramov Zəngəzur dəhlizi layihəsinin başa çatdırılmasının vacibliyini vurğulayıb.
“Bu layihənin başa çatdırılması vacibdir. Artıq Avropadan Türkiyə və Azərbaycan üzərindən bağlantının təmin olunması üçün şərait yaranacaq”, – nazir bildirib.
Bayramov Zəngəzur dəhlizinin Orta Dəhlizin yeni istiqaməti kimi xüsusi önəm daşıdığını qeyd edib.
Layihənin reallaşması ilə Naxçıvanın Azərbaycan və Türkiyə arasında quru və dəmir yolu bağlantısında daha mühüm mövqe qazanması, eyni zamanda Avropa ilə Mərkəzi Asiya arasındakı nəqliyyat əlaqələrinin genişlənməsi üçün əlavə imkanların yaranması gözlənilir. /APA/
