Türkiyənin Ağrı dağı ərazisində Nuhun gəmisinin axtarışları zamanı gil qablar aşkar edilib.
Sivas Universitetinin beynəlxalq tədqiqat layihəsinin rəhbəri, professor Cenkər Atilla bildirib ki, tapıntılar Ağrı dağı yaxınlığındakı axtarış ərazisində qeydə alınıb.
Alimin sözlərini NTV yayıb.
Onun sözlərinə görə, qazıntılar zamanı tapılan gil qabların Dünya daşqınından əvvəlki dövrə aid olduğu ehtimal edilir. Torpaq nümunələri araşdırılması üçün Ankaraya göndərilib və analiz prosesi hələ davam edir.
“Atilla bildirib ki, qazıntılar zamanı Dünya daşqınından əvvəlki dövrə aid olduğu ehtimal edilən gil qablar aşkar olunub. Torpaq nümunələri tədqiqat üçün Ankaraya göndərilib. Torpağın analiz prosesi hələ davam edir. Hazırda 100 faizlik nəticə əldə etməmişik, lakin bəşəriyyəti təəccübləndirəcək məlumatlarımız var”, – alim deyib.
Tədqiqatların Ağrı dağından 28 kilometr məsafədə yerləşən Durupınar ərazisindəki qaya formasiyasında aparıldığı bildirilir.
Sözügedən qaya formasiyasının konturları nəhəng gəmiyə bənzəyir. Onun uzunluğu 164 metrdir. Bu ölçünün Əhdi-Ətiqdə Nuhun gəmisinin ölçüləri ilə uyğun gəldiyi qeyd olunur.
Bununla belə, gil qabların və torpaq nümunələrinin hansı dövrə aid olduğu barədə yekun elmi nəticə hələ açıqlanmayıb. Hazırda laboratoriya araşdırmalarının başa çatması gözlənilir.
