Bir çox insan yatarkən corab geyinməyə öyrəşib. Xüsusilə soyuq havalarda bu, ayaqları isti saxlamaq üçün rahat üsul hesab olunur. Lakin corabların gün ərzində ayaqda qalması, gecə də çıxarılmaması və xüsusilə sıx olması bəzi hallarda ayaq dərisinin sağlamlığına və yuxu komfortuna mənfi təsir göstərə bilər.
Əsas problem corabın özündən çox, onun nə qədər sıx olması, nə qədər müddət geyinilməsi və ayağın içində nəmli-isti mühit yaradıb-yaratmamasıdır.
Günboyu geyilən corabla yatmaq niyə problem yarada bilər?
Ayaqlar gün ərzində tərləyir. Əgər corab uzun müddət dəyişdirilmədən ayaqda qalırsa, onun daxilində istilik və nəmlik artır. Bu mühit bəzi bakteriya və göbələklərin çoxalması üçün əlverişli ola bilər.
Xüsusilə ayaqları çox tərləyən insanlarda nəmli mühit göbələk infeksiyalarının yaranması üçün risk faktorlarından biri hesab olunur. Buna görə gecə yatmazdan əvvəl corabları dəyişmək, ayaqları təmiz və quru saxlamaq daha məqsədəuyğundur.
Corabın çox sıx olması da narahatlıq yarada bilər. Ayaq biləyində güclü iz buraxan, dərini sıxan elastik hissələr yuxu zamanı komfortu azalda bilər. Qan dövranı ilə bağlı problemi olan insanlarda isə sıx geyimlərə xüsusi diqqət yetirmək lazımdır.
Yatarkən corab geyinmək hamı üçün zərərlidirmi?
Xeyr. Sağlam insan üçün təmiz, quru, yumşaq və ayağı sıxmayan corabla yatmağın mütləq şəkildə zərərli olduğu deyilə bilməz.
Əksinə, bəzi insanlar üçün ayaqların isti saxlanması yuxuya getməyi asanlaşdıra bilər. Burada əsas məsələ corabın düzgün seçilməsi və ayaqların həddindən artıq qızdırılmamasıdır.
Əgər corab ayağı sıxırsa, ayaqlar həddindən artıq tərləyirsə, qaşınma, qızartı, pis qoxu və ya dəridə dəyişikliklər yaranırsa, gecə corabsız yatmaq və ayaqları daha yaxşı havalandırmaq faydalı ola bilər.
Yatarkən hansı geyimlərdən uzaq durmaq lazımdır?
Yuxu zamanı yalnız corab seçimi deyil, geyimin ümumi rahatlığı da əhəmiyyətlidir.
Çox dar geyimlər bədəni sıxa və rahat hərəkəti məhdudlaşdıra bilər. Xüsusilə bel, ayaq biləyi və digər nahiyələrdə sıx elastik hissələr narahatlıq yarada bilər.
Havanı zəif keçirən materiallar isə bədən istiliyinin və tərin artmasına səbəb ola bilər. Buna görə yuxu geyimində nəfəs alan və rahat materiallara üstünlük vermək daha məqsədəuyğundur.
Həddindən artıq qalın geyim də yuxunun keyfiyyətinə təsir edə bilər. Orqanizm yuxuya keçid zamanı bədən temperaturunu tənzimləyir. Həddindən artıq isinmək isə bəzi insanlarda gecə narahatlığı və yuxunun bölünməsi ilə nəticələnə bilər.
Ayaqların sağlamlığı üçün nə etmək olar?
Yatmazdan əvvəl ayaqları yumaq və yaxşı qurulamaq, gün ərzində tərləyən corabları dəyişmək, ayağı sıxmayan corablardan istifadə etmək və yataq otağını həddindən artıq isti saxlamamaq sadə, lakin faydalı tədbirlərdir.
Xüsusilə ayaqlarda qan dövranı ilə bağlı problem, diabet, davamlı göbələk infeksiyası və ya sağalmayan yaralar olan şəxslər ayaq baxımına daha ciddi yanaşmalıdır.
Yəni “gecə corabla yatmaq mütləq zərərlidir” demək düzgün deyil. Əsas məsələ ayaqların həddindən artıq isinməməsi, nəm qalmaması və corabın qan dövranını məhdudlaşdıracaq qədər sıx olmamasıdır.
