Reabilitasiya həkimi Min Yu bel ağrısı zamanı tam hərəkətsiz qalmağı ən böyük səhvlərdən biri adlandırıb.
Terra nəşrinin yazdığına görə, ağrı başlayanda narahatlıq tam keçənədək istirahət etmək ən yaxşı seçim kimi görünə bilər. Lakin həkim bunun düzgün yanaşma olmadığını bildirir.
“Belə hallarda nisbi istirahət tövsiyə olunur. Ancaq bu, tam hərəkətsizlik demək deyil, çünki bu, vəziyyəti hər zaman yaxşılaşdırmır. Ağrını artıran hərəkətlərdən müvəqqəti uzaq durmaq, eyni zamanda orqanizmin imkanlarını nəzərə alaraq yüngül hərəkətləri davam etdirmək məsləhətdir”, – deyə həkim izah edib.
Mütəxəssisin sözlərinə görə, ağrı, məsələn, idman zamanı yaranarsa, bərpa prosesi başa çatana qədər məşqləri dayandırmaq lazımdır.
Min Yu bildirib ki, bel ağrısının səbəbi əzələlərin dartılması, fəqərəarası disk yırtığı, onurğa oynaqlarının artriti və ya oma-qalça oynağının qıcıqlanması ola bilər. Daha nadir hallarda ağrı fəqərənin sınığı ilə əlaqəli olur.
Ağrının hansı nahiyədə hiss edilməsi və hansı hərəkətlər zamanı güclənməsi həkimə səbəbi müəyyənləşdirməyə kömək edir. Məsələn, irəli əyilərkən ağrının artması fəqərəarası disklə bağlı problemə, arxaya əyilərkən güclənməsi isə onurğa oynaqlarındakı narahatlığa işarə edə bilər.
Bel ağrısını evdə necə yüngülləşdirmək olar?
Həkimlər nisbi istirahətlə yanaşı, ağrının ilk günlərində soyuq kompresdən, sonrakı mərhələdə isə istidən istifadə etməyi tövsiyə edirlər.
Ağrıkəsici dərmanlar da kömək edə bilər. Lakin böyrək xəstəlikləri, mədə xorası, ürək-damar problemləri və ya qaraciyər xəstəlikləri olan insanlar bu preparatlardan istifadə edərkən xüsusilə ehtiyatlı olmalıdırlar.
Dərman qəbul etməzdən əvvəl həkimlə məsləhətləşmək vacibdir. Bel ağrısı güclüdürsə, davam edirsə və ya ayaqlarda zəiflik, keyimə, sidik və ya nəcis saxlamaqda çətinlik kimi əlamətlərlə müşayiət olunursa, təcili tibbi yardım almaq lazımdır.
Sunay Aydın
