İspaniya çempionatının vitse-çempionu “Real Madrid”in və Fransa millisinin hücumçusu Kilian Mbappe Mao Tszedun haqqında səsləndirdiyi fikirlərə görə Çin xalqından üzr istəyib.
“Bu yaxınlarda verdiyim müsahibə zamanı öz təsvirimə münasibət bildirdim. Şərhim yersiz idi və indi başa düşürəm ki, bu sözlərim Çində və dünyanın müxtəlif yerlərində yaşayan Çin icmalarının nümayəndələrini incidib.
Sözlərimdən narahat olan hər kəsdən üzr istəyirəm. Məqsədim qətiyyən bu olmayıb. Çin xalqına və onun tarixinə dərin hörmət bəsləyirəm və səmimi qəlbdən üzr istəyirəm.
Kilian Mbappe”, – deyə 27 yaşlı futbolçu özünün “Twitter” səhifəsində fransız, Çin və ingilis dillərində yazıb.
Xatırladaq ki, futbolçu müsahibələrinin birində onu diktator kimi təsvir edən memlərdən danışıb. O, üzünün “Çin diktatorunun” təsvirinə yerləşdirildiyi memi ən gülməlisi adlandırıb. Ehtimal olunur ki, söhbət Çinin keçmiş lideri Mao Tszedundan gedib.
Bundan sonra Çin dövlət televiziyası İspaniya La Liqasının oyunlarının yayımlanmasını dayandırıb. Bir neçə Çin şirkəti də futbolçu ilə əməkdaşlığına son qoyub. Mbappenin iştirakı ilə hazırlanan bütün reklamlar və videolar efirdən çıxarılıb.
