Ürək-damar xəstəlikləri heç də həmişə sinədə kəskin ağrı və ya səhhətin qəfil pisləşməsi ilə müşayiət olunmur. Bəzən ilk əlamətlər insanın gündəlik fəaliyyətləri zamanı üzə çıxır. Buna görə də şəxs uzun müddət sağlamlığında problem olduğunu hiss etməyə bilər.
Britaniyalı kardioloq Amit Bahay bildirib ki, ürək xəstəliklərinin mümkün əlamətlərindən biri qeyri-adi dərəcədə tez yorulmaqdır. Xüsusilə kiçik fiziki yükün belə təngnəfəslik, halsızlıq yaratdığı və ya insanı dincəlmək üçün dayanmağa məcbur etdiyi hallara diqqət yetirmək lazımdır.
Məsələn, pilləkənlə qalxarkən çətinlik çəkmək ürək-damar sisteminin fəaliyyətində pozuntuların göstəricisi ola bilər. Əgər insan üçün iki mərtəbə pilləkən qalxmaq belə çətinləşibsə, bu, tibbi müayinədən keçmək üçün əsas ola bilər. Xüsusilə də əvvəllər həmin fiziki yükü heç bir çətinlik çəkmədən yerinə yetirirdisə.
Bu cür dəyişikliklər bəzən ürəyin işemik xəstəliyi, ürək ritminin pozulması və ya ürək qapaqlarının xəstəlikləri ilə əlaqəli olur. Bununla belə, təngnəfəslik təkbaşına konkret diaqnoz demək deyil. Çünki bu əlamət başqa səbəblərdən də yarana bilər.
Digər mümkün xəbərdarlıq əlaməti oturaq və ya uzanmış vəziyyətdən qəfil ayağa qalxarkən başgicəllənmənin yaranmasıdır. Bu hiss arterial təzyiqdəki dəyişikliklər, ürək ritminin pozulması və tibbi qiymətləndirmə tələb edən digər vəziyyətlərlə bağlı ola bilər.
Önə əyilərkən yaranan narahatlıq da xüsusi diqqət tələb edir. Əgər belə hallar təkrarlanırsa və ya halsızlıq, nəfəs almaqda çətinliklə müşayiət olunursa, bunun səbəbini araşdırmaq vacibdir.
Kardioloq döş qəfəsində sıxılma və təzyiq hissini də mühüm əlamətlər sırasında qeyd edib. Bu simptom yalnız ağır fiziki iş zamanı deyil, gündəlik məşğuliyyətlər zamanı da meydana çıxa bilər.
Bəzi hallarda ürək problemləri boyuna, çiyinə və ya sol qola yayılan ağrılarla müşayiət olunur. Bu hisslər sinədə təzyiq, soyuq tər və ya təngnəfəsliklə eyni vaxtda yaranırsa, onları qətiyyən diqqətdən kənarda saxlamaq olmaz.
Stuldan qalxmaqda qəfil çətinlik yaranması da ürək-damar problemlərinin mümkün, lakin az nəzərə çarpan əlamətlərindən biri ola bilər. Əgər əvvəllər adi hesab edilən bu hərəkət birdən-birə daha çox güc tələb edirsə, bu, fiziki vəziyyətin pisləşməsinə işarə edə bilər.
Diqqət yetirilməli digər əlamət aşağı ətraflarda şişkinliyin yaranmasıdır. Ayaq pəncələrinin və topuqların şişməsi bəzən orqanizmdə mayenin yığılması ilə əlaqədar olur. Bu hal ürək çatışmazlığı zamanı da müşahidə edilə bilər.
Bununla belə, sadalanan əlamətlər yalnız ürək xəstəliklərinə xas deyil. Onlar qanazlığı, maddələr mübadiləsinin pozulması, ağciyər xəstəlikləri və digər sağlamlıq problemləri zamanı da ortaya çıxa bilər.
Risk faktorlarından biri də COVID-19 daxil olmaqla, keçirilmiş virus infeksiyalarının fəsadları ola bilər. Bəzi hallarda infeksiya ürək əzələsinin iltihabına və digər ağırlaşmalara səbəb olur.
Mütəxəssislər xüsusilə yeni yaranan, təkrarlanan və ya tədricən şiddətlənən simptomlara diqqət yetirməyi tövsiyə edirlər. Vaxtında həkimə müraciət etmək onların səbəbini müəyyənləşdirməyə və zərurət yarandıqda ciddi fəsadlar inkişaf etməzdən əvvəl müalicəyə başlamağa imkan verir.
