Türkiyə Prezidenti Rəcəb Tayyib Ərdoğan Qarabağ Zəfərinin 6-cı ildönümünü Azərbaycan Prezidenti İlham Əliyevlə birlikdə Şuşada qeyd etməkdən məmnunluğunu ifadə edib.
Ərdoğan sosial şəbəkə hesabında paylaşdığı müraciətdə Şuşanı tarix, təbiət və mədəniyyət şəhəri adlandırıb.
“Qarabağ Zəfərinin 6-cı ildönümünü Azərbaycan Prezidenti, əziz qardaşım İlham Əliyevlə birlikdə tarix, təbiət və mədəniyyət şəhəri olan gözəl Şuşada qeyd etməkdən məmnunluq duydum”, – deyə Türkiyə lideri bildirib.
O qeyd edib ki, 6 il əvvəl İlham Əliyevin qətiyyətli rəhbərliyi altında bir yumruq kimi birləşən Azərbaycan xalqı böyük qəhrəmanlıq göstərərək Qarabağı yenidən azadlığına qovuşdurub.
“Bu şanlı qələbə Azərbaycanın haqlı mübarizəsinin ən gözəl təzahürü, bütün Türk coğrafiyasının qürur mənbəyi olmaqda davam edir”, – deyə Ərdoğan vurğulayıb.
Türkiyə Prezidenti Azərbaycanın 44 günlük Vətən müharibəsi ilə öz torpaqlarını işğaldan azad etməsinin Cənubi Qafqazda yeni dövrün başlanğıcını qoyduğunu bildirib.
Ərdoğanın sözlərinə görə, qarşıda duran əsas vəzifə döyüş meydanlarında qazanılan qələbəni davamlı sülh və sabitliklə möhkəmləndirməkdir.
“Biz Azərbaycanın haqlı mübarizəsinə sahib çıxdığımız kimi, bölgəmizdə davamlı sülhün təmin olunmasına yönəlmiş səmimi səylərini də dəstəkləyirik”, – deyə o qeyd edib.
Türkiyə lideri Qarabağın yenidən qurulması və bölgənin əvvəlki canlılığına qovuşdurulması istiqamətində Azərbaycanın səylərini yüksək qiymətləndirdiyini bildirib.
“Qarabağda yenidən tüstülənən hər ocaq, ucaldılan hər tikili və bərpa edilən hər tarixi irs Azərbaycanın gələcəyə inamını göstərir.
İnşallah, bu yolda təcrübəmizi bölüşməyə, yenidənqurma və inkişaf səylərinə töhfə verməyə davam edəcəyik”, – deyə Ərdoğan paylaşımını tamamlayıb.
