Macarıstanın keçmiş baş naziri Viktor Orbanın qardaşı saxlanılıb.
Bu barədə ölkənin baş naziri Peter Magyar məlumat verib.
“Media məlumatlarına görə, Viktor Orbanın qardaşı Aron Orban insan alverində şübhəli bilinərək saxlanılıb”, – deyə Magyar Facebook səhifəsində yazıb.
AFP agentliyinin məlumatına görə, bu barədə ilk xəbəri Magyarın qardaşına məxsus Kontroll xəbər saytı yayıb. Nəşrin məlumatında bildirilirdi ki, hüquq-mühafizə orqanları insan alveri ilə bağlı araşdırma çərçivəsində keçirilən əməliyyat zamanı “bir neçə nəfəri” saxlayıb. Onların yaşadıqları ünvanlarda axtarışlar aparılır.
Əməliyyat Macarıstan Milli İstintaq Bürosu (NNI) və Magyarın təşəbbüsü ilə yaradılmış korrupsiyaya qarşı mübarizə qurumu – Milli Aktivlərin Qaytarılması və Mühafizəsi İdarəsi (NVVH) tərəfindən həyata keçirilir.
Macarıstanın keçmiş baş naziri Viktor Orban qardaşının saxlanılmasını “çirkli oyun” adlandırıb və hökuməti siyasi rəqiblərini sıradan çıxarmağa cəhddə ittiham edib. “Söhbət əslində məndən gedir, qardaşım isə sadəcə vasitədir”, – deyə siyasətçi sosial şəbəkələrdə yazıb.
Buna cavab olaraq Peter Magyar bildirib ki, Orban bu açıqlaması ilə qardaşının saxlanıldığını faktiki olaraq təsdiqləyib.
Aron Orban qardaşının hakimiyyətdə olduğu dövrdə bir neçə uğurlu biznes layihəsi yaradıb. AFP yazır ki, ötən il araşdırmaçı jurnalistlər onun şirkətlərindən birini Macarıstanda iş vizalarının alınmasına kömək göstərilməsi ilə bağlı ehtimal olunan sxemlə əlaqələndiriblər.
N.Talıblı
