Hollivud ulduzu, Kaliforniyanın keçmiş qubernatoru Arnold Şvartsenegger Respublikaçılar Partiyasının son illərdə ciddi dəyişikliklərə məruz qalmasına baxmayaraq, özünü hələ də respublikaçı hesab etdiyini bildirib.
Aktyor Cimmi Kimmelin aparıcılıq etdiyi televiziya proqramında siyasi baxışlarından niyə imtina etmək istəmədiyini izah edib və onun fikrincə, əsl respublikaçıların hansı prinsiplərə sahib olmalı olduğunu xatırladıb.
“Jimmy Kimmel Live” proqramının efirində 79 yaşlı Şvartseneggerdən hələ də Respublikaçılar Partiyasının üzvü olub-olmadığı soruşulub. “Bəli, mən respublikaçıyam. Şübhəsiz ki”, – deyə aktyor cavab verib. Onun sözlərinə görə, ənənəvi respublikaçı köləliyin ləğvinin tərəfdarı olduğuna görə bu partiyanın dəyərlərinə hörmət edən insandır.
Kimmel isə qeyd edib ki, indiki Respublikaçılar Partiyası artıq bu tarixi xidmətinə görə əvvəlki kimi tanınmağa ümid edə bilməz. “Amma bu, tarixdir. Mən məhz həmin prinsiplərə əsaslanıram. Respublikaçılar keçmiş qullara ABŞ vətəndaşlığı və səsvermə hüququ veriblər”, – deyə Şvartsenegger bildirib.
Aparıcı diqqətə çatdırıb ki, respublikaçıların hazırkı siyasi mövqeyi aktyorun danışdığı dəyərlərlə bir çox məsələdə ziddiyyət təşkil edir. “Bəli, amma bu, mənim öz fəlsəfəmi dəyişməli olduğum anlamına gəlmir”, – deyə aktyor cavab verib.
Şvartsenegger ABŞ-ın keçmiş prezidenti Ronald Reyqanın siyasi prinsiplərinə sadiq qaldığını vurğulayıb. O xatırladıb ki, məhz Reyqanın hakimiyyəti dövründə Kaliforniyada atmosfer havasının keyfiyyətinə nəzarət şurası yaradılıb. Bu qurum istixana qazlarının emissiyası və ətraf mühitin çirklənməsi məsələlərini tənzimləyirdi.
Aktyor, həmçinin ABŞ-ın Ətraf Mühitin Mühafizəsi Agentliyinin (EPA) yaradıldığı dövrün prezidenti Riçard Niksonu da xatırladıb. Onun sözlərinə görə, Reyqan və Nikson demokratlarla əməkdaşlıq etməyi və konkret nəticələr əldə etməyi bacaran respublikaçılar nəslini təmsil edirdilər. “Mən də məhz belə bir respublikaçıyam”, – deyə Şvartsenegger vurğulayıb.
Kimmel aktyorun Respublikaçılar Partiyasında tədricən yoxa çıxan nəslin nümayəndəsi ola biləcəyini ehtimal edib. “Burada tək qaldığımı düşünmürəm. Bu, təslim olmalı olduğumuz anlamına gəlmir”, – deyə Kaliforniyanın keçmiş qubernatoru bildirib.
Daha sonra Şvartsenegger ABŞ-da keçirilən aralıq seçkilərin nəticələrini şərh edib. Həmin seçkilər demokratların mövqelərinin güclənməsi ilə nəticələnib. “Son nəticədə bəzilərinin mavi dalğa adlandırdığı hadisənin şahidi olduq. Mən bunu qabarma dalğası, hətta sunami adlandırardım. Bu, artıq sadəcə dalğa deyil”, – deyə o bildirib.
Aktyor xatırladıb ki, ABŞ-ın siyasi sistemi mütəmadi olaraq istiqamətini dəyişir: əvvəlcə demokratlar çoxluğu əldə edir, sonra hakimiyyət respublikaçılara keçir, bir müddət sonra isə vəziyyət yenidən təkrarlanır.
Şvartsenegger demokratlarla respublikaçılar arasında davamlı qarşıdurma əvəzinə, siyasətçiləri əməkdaşlığa çağırıb. O qeyd edib ki, Kaliforniyanın qubernatoru olduğu dövrdə məhz bu yanaşma ona uğurlu nəticələr əldə etməyə kömək edib. “Demokratlar və respublikaçılar birlikdə işləməlidirlər. Mən Kaliforniyanın qubernatoru olduğum zaman belə çalışırdıq. Nəticə əldə etməyin yolu budur. Bir-birini daim ittiham etmək, barmaqla göstərmək və rəqibləri təhqir etmək heç nəyə gətirib çıxarmır”, – deyə aktyor bildirib.
N.Talıblı
