Ermənistanın Baş naziri Nikol Paşinyan Dublində bəyan edib ki, dekabr ayında Rusiyaya səfər edəcək.
“Dekabrın 3-də, 11-də və 22-də danışıqlar aparmaq üçün Rusiya Federasiyasına səfər edəcəyəm. Ümid edirəm ki, Rusiya ilə münasibətlərimizdə dostluq atmosferini qoruyub saxlaya biləcəyik.
Ermənistan eyni zamanda həm Avrasiya İqtisadi İttifaqının (Aİİ), həm də Avropa İttifaqının üzvü ola bilməz.
Bizim əsas siyasi məqsədimiz Ermənistan vətəndaşları üçün alternativ yaratmaq olub və olaraq qalır. Uzun müddət belə bir təsəvvür mövcud idi ki, Ermənistanın başqa seçimi yoxdur. Hətta Aİİ liderlərindən biri açıq şəkildə bəyan etmişdi ki, Ermənistanın Aİİ-dən başqa gedəcək yeri yoxdur. Bu açıqlama isə müəyyən siyasi proseslərə səbəb oldu”, – Paşinyan bildirib.
Ermənistanın 20 ildən sonra necə görünəcəyini təsəvvür etməsi barədə suala cavabında Paşinyan deyib: “Ermənistanı Avropa İttifaqının tərkibində görürəm”.
