Türkiyənin Ankara şəhərindəki məhkəmə İstanbulun sabiq meri Əkrəm İmamoğlunu müxalif Cümhuriyyət Xalq Partiyasının (CHP) 2023-cü ilin noyabrında keçirilən qurultayında yol verildiyi iddia olunan qanun pozuntuları ilə bağlı iş üzrə 2 il 1 ay müddətinə azadlıqdan məhrum edib. Məhkəmə, həmçinin onun siyasi hüquqlarının məhdudlaşdırılması barədə qərar qəbul edib.
Azpost.info bildirir ki, bu barədə TRT Haber məlumat yayıb.
İş üzrə İmamoğlu da daxil olmaqla, ümumilikdə 9 nəfər məhkum edilib. Daha 3 təqsirləndirilən şəxsə bəraət verilib.
İstintaqın iddiasına görə, CHP-nin qurultayı zamanı nümayəndələr partiyanın sədri seçilən Özgür Özəlin lehinə səs verməyə təhrik ediliblər. İttihama əsasən, bəzi nümayəndələrə pul, iş və vəzifələrə namizədlik təklif olunub, ərzaq kartları paylanıb, onlardan doldurulmuş bülletenlərin fotosunu çəkmələri istənilib. Təqsirləndirilən şəxslər isə irəli sürülən ittihamları rədd ediblər.
Həbsindən əvvəl Əkrəm İmamoğlu Türkiyə Prezidenti Rəcəb Tayyib Ərdoğanın əsas potensial rəqiblərindən biri hesab olunurdu. O, İstanbul bələdiyyəsində ehtimal olunan korrupsiya halları ilə bağlı başqa bir iş üzrə də həbsdədir və bu ittihamları qəbul etmir.
Qeyd edək ki, Türkiyə məhkəmələri daha əvvəl də İmamoğlunun siyasi fəaliyyətinə məhdudiyyətlər qoyulmasını nəzərdə tutan qərarlar çıxarıb. Yeni qərar da ittiham hökmü qanuni qüvvəyə minəcəyi təqdirdə onun siyasi fəaliyyətinə məhdudiyyətlərlə nəticələnə bilər.
N.Talıblı
