ABŞ BP-yə Azərbaycandakı “Şahdəniz” qaz layihəsində tərəfdaşı olduğu Rusiya və İran şirkətlərinə sanksiyadan kənar yolla ödəniş etməklə bağlı verdiyi lisenziyanı uzadıb.
Azpost.info bildirir ki, bu barədə Bloomberg News xəbər verir.
Şahdəniz qaz-kondensat yatağının işlənməsi üzrə konsorsiuma Rusiyanın Lukoil və İranın NICO (İran Milli Neft Şirkəti) şirkətləri daxildir. BP konsorsiumun operatorudur və 29,99% paya malikdir.
2025-ci ilin ortalarına olan məlumata görə, Lukoil konsorsiumun səhmlərinin 19,99%-nə, Türkiyənin TPAO-suna 19%-nə, Cənub Qaz Dəhlizinə (SOCAR və Azərbaycan İqtisadiyyat Nazirliyinə məxsusdur) 16,02%-nə, NICO-ya 10%-nə və Macarıstanın MVM-nə 5%-ə sahibdir.
NICO əvvəldən Şahdəniz konsorsiumunda təmsil olunub. Nəşr qeyd edir ki, ABŞ sanksiyalarına məruz qalan İran şirkətinin Xəzər dənizindəki böyük Azərbaycan qaz-kondensat yatağında iştirakı Vaşinqtonla razılaşdırılıb.
ABŞ BP-yə bu konsorsiumda İran şirkəti ilə işləmək səlahiyyəti verib.
Rusiyanın Lukoil şirkətinə ötən il Prezident Donald Tramp tərəfindən sanksiya tətbiq edilib. O vaxt ABŞ hökuməti şirkətə Azərbaycandakı aktivləri də daxil olmaqla, xarici aktivlərini satmaq üçün vaxt vermişdi. Lakin Lukoil hələ də bu aktivlər üçün alıcı tapa bilməyib.
